Inhlanganiso yeZimbabwe Congress of Trade Unions-ZCTU ithi izaqhuba imihlangano lezisebenzi ezivela kuzigaba ezitshiyeneyo kunsukwana ezilandelayo, eyokulungiselela ukuthi zikhalale umsebenzi ngasikhathi sinye ngendlela yokubamba uhulumende ngamandla ukuthi alalele izikhalazo zazo.
Lokhu kulandela inkuthazo evela kunhlanganiso yababalisi bemaphandleni eye Amalgamated Rural Teachers Union of Zimbabwe, yona ethi kufanele izisebenzi zonke zihlanganise amakhanda zitshengisele, zisola umphathintambo obona ngezemali uMnu. Mthuli Ncube ngeviki ezayo ukuthi uyehluleka ukulungisa udaba lwezemali.
Odokotela abasebenza ezibhedlela zikahulumende baphakathi kokukhalala umsebenzi, njalo ezinye inhlanganiso zababalisi zithi aziyikuya ezikolo lapho zivulwa nxa uhulumende engakhuphulanga iholo lazo.
Esinye sezikhalazo zezisebenzi ngesokuthi uhulumende azibhadale ngedola leMelika.
UMnu. Japhet Moyo, unobhala jikelele wenhlanganiso yeZCTU uthi sebeqalisile ukuxoxisana lezisebenzi kodwa basamelele ukuthi zonke zibuyele emisebenzini ukwenzela ukuthi ukutshengisela abakuqoqayo kube lesisindo.
