Umkhokheli webandla leZANU PF uMnu. Emmerson Mnangagwa nguye onqobileyo kukhetho lokudinga umongameli welizwe ngemva kokuthola amavoti angu2, 460,463. UMnu. Mnangagwa unqobe umkhokheli womanyano weMDC Alliance uMnu Nelson Chamisa yena othole amavoti angu2, 147,436. Kodwa uMnu. Chamisa uthi kayamukeli limpumela. Isiphathamandla somanyano lo uMnu Morgen Komichi utshele intathelizindaba izolo ukuthi inhlanganiso ebona ngokuqhutshwa kokhetho elizweni eyeZEC iqilibezele. Ngesilingaliso ekhulwini, uMnu. Mnangagwa uthole amavoti edlula kancane angamatshumi amahlanu, 50.8% kwathi uMnu. Chamisa wathola angamatshumi amane lane, 44.3%. UMnu. Chamisa ukhangelelwe ukwethulela uzulu inani athi yilo eliqondileyo elokunqoba kwakhe ngoLwesihlanu ekuseni.
Ngaphambilini kokwethulwa kwempumela yokhetho, uMnu. Chamisa utshele intathelizindaba ukuthi uyakwazi kakumpuphuthi ukuthi unqobile kulolukhetho. Wethese ibandla lika Mnu. Mnangagwa umlandu wokuqila kulolukhetho. Uthe kasoze emukele ukubumba uhulumende womanyano.
Kodwa uMnu. Chamisa unqobe uMnu. Mnangagwa okulesisindo ngamavoti edlula ingxenye yesigidi-548,889 esigodlweni eHarare.
Ngolwesithathu amakhulu lamakhulu abasekeli bakhe batshengisele beqonde lapho obusekusethulwa impumela yokhetho kwacina kuqhamuka udlakela amasotsha adubula abulala abatu abayisithupha, alimaza abalitshumi lane.
KoBulawayo, ukunqoba kukaMnu. Mnangagwa kwamukelwe ngenjabulo langensolo.
Abasekeli bebandla leZANU PF bathi bayathokoza kakhulu ngokunqoba kuka Mnu. Mnangagwa kanye lebandla lakhe leZANU PF kulolukhetho. Omunye wabo nguMnu. Kelvin Manduna, ofunda ekolitshini leHoward University khonapha eMelika.
Kusenjalo, izizalwane zeZimbabwe ezihlala kweleSouth Africa sezethule imbono ehlukeneyo kulandela ukunqoba kukaMnu. Mnangagwa abanye besithi badane kakhulu kukanti abanye besithi uzulu usekhulumile, sekufanele impilo iqhubeke.