amalinks wokungena

Breaking News

ANC: Sokumele uJacob Zuma Asuke Esikhundleni Sikamongameli Wakwele South Africa


UMongameli webandla leAfrican National Congress uMnu. Cyril Ramaphosa loMongameli Jacob Zuma. URamaphosa ukhangelelwe ukuthi uzathatha isikhundla sikaZuma ngomnyaka ka2019 engakhethwa nguzulu ekubandla leANC.

Idale elimqoka lebandla elibusayo kwele South Africa iNational Executive Committee ye African National Congress (ANC), isitshele umongameli Jacob Zuma ukuthi ehle esihlalweni ngoba engehluleka ukwenza njalo uzabanjwa ngamandla.

Kodwa-ke uZuma uthi akayindawo.

Ngemva komhlangano othethe amahola alitshumi lantathu kusukela ngoMvulo kwaze kwaba ngoLwesibili ekuseni, iNational Executive Committee (NEC) yebandla leANC, iphume lesinqumo sokuthi uZuma ehliswe esihlalweni sokuba ngumongameli.

Lokhu kulandela imihlangano eminengi eqhutshwe phambilini kodwa uZuma esala ukubeka phansi intambo. Langemva kwalesi sinqumo sakhathesi uZuma uthe akayindawo wacela ukuthi ibandla lakhe limuphe inyanga eziyisithupha aqedelele ezinye zenhlelo abelazo.

Unobhala jikelele webandla leANC, uMnu. Ace Mahashule, utshele abezindaba lamhlanje eJohannesburg ukuthi i ANC ikubeke kwacaca kumongameli Zuma ukuthi kufuze abeke phansi intambo manje hatshi ngemva kwezinyanga.

“Loba uzavuma ukutshiya isikhundla loba hatshi, esikutshoyo yikuthi sesithethe isinqumo. Nxa sisithi ilunga lethu kalehle esihlalweni, sikhangelele ukuthi lenze khonalokho kanye okufunwa libandla. Angazi kuzakwenzakalani kodwa leyo asiyitshiyeni ezandleni zikamongameli Zuma.”

Ukwethulwa kukamongameli Zuma esikhundleni sakhe obekufuze ehle kiso ngomnyaka ozayo sekwemukelwe ngendlela etshiyeneyo yizizalwane zeZimbabwe kweleSouth Africa. Abanye bathi kusobala ukuthi inkokheli zamazwe eAfrica ukubusa zikuthanda okwedlulise amalawulo.

Abanye bathi bayamangala ukuthi uZuma yini engafundanga isifundo kulokhu okwenzakala kumnumnzana Robert Mugabe.

Isizalwane seZimbabwe, uMnu. Mlungisi Tshabalala, uthi sekusobala okufuze akwenze umnumnzana Zuma ngoba nxa ibandla lakhe lingasamfuni uzowelwa yilokhu okwawela umnumnzana Robert Mugabe.

“Mina nginguJacob Zuma ngingahle ngitshiye isikhundla lesi. Sekumele ukuthi uJacob Zuma akulalele lokho. Lokho okokuthi ayalele esikhundleni bona bemxwayisile ukuthi ayenze kanje ukwenzela ukuthi ephume elesithunzi ehloniphekile.”

Kodwa-ke esinye isizalwane seZimbabwe, uMnu. Big Foster Nkomose, uthi lobanje uZuma esekhitshiwe balethemba lokuthi linguquko ayizukwenza impilo yabeZimbabwe ibenzima kweleSouth Africa.

Ibandla leANC lithi likhangelele ukuthi uZuma aphendule ngoLwesithathu ukuthi uzakwehla esihlalweni kumbe hatshi. Nxa uZuma engala kuzafuze kuqhubeke uhlelo lokumkhipha ngevoti ephalamende. Okwamanje amabandla aphikisayo avele eseliphiwe ilanga lalolohlelo.

Bafuna uZuma Aphume Aphele Esikhundleni ...
please wait

No media source currently available

0:00 0:02:34 0:00

Facebook Forum

XS
SM
MD
LG