Ibandla leMDC Alliance selisole kakhulu amazwi kaMongameli Emmerson Mnangagwa awokuthi uhulumende kasoze aguqule imithetho elawula ukhetho ngoba kudala sowakulungisa lokho elandela iziqondiso ezabekwa ngumanyano weSadc eziphathelane lokuqhutshwa kokhetho olukhululekileyo.
UMnangagwa wethule amazwi la emhlanganweni weZanu PF Politburo izolo.
Uthe labo abagqugquzela ukuguqulwa kwendlela ukhetho oluqhutshwa ngayo kumbe ama-electoral reforms ngesingisi, abakwazi abakukhulumayo ngoba nxa bebuzwa ukuthi kahle-kahle yiphi imithetho abafuna iguqulwe, abaphi impendulo ecacayo.
Lokhu kuphikiswe ngamabandla aphikisayo esithi uMnangagwa wazi mhlophe okumele kwenziwe ukuze kuqhutshwe ukhetho olukhululekileyo eZimbabwe olwamukelwa ngumuntu wonke.
Umsekeli wesikhulumeli seMDC Alliance, uMnu. Felix Magalela Mafa Sibanda utshele iStudio ukuthi phakathi kwezinto ezimele zilungiswe, bafuna ikhomishini yokhetho, iZimbabwe Electoral Commission (ZEC), ikhethwe kutsha.
Kodwa ilunga leZanu PF uMnu Believe Gaule uvikele uMnangagwa esithi uqondile.
Kusenjalo, uMnangagwa izolo uguqule idale leZanu PF Politburo wakhetha umkakhe uAuxillia ukuba ngunobhala obona ngezemvelo lokwethekelelwa kwelizwe.
UNkosikazi Mnangagwa ubengumsekeli kanobhala obephethe lesisikhundla.
UMnangagwa ukhethe njalo uMnu Christopher Mutsvangwa ukuba yisikhulumeli seZanu PF kulandela ukubhubha kobekulesikhundla uMnu Simon Khaya Moyo.
Obephethe lesisikhundla okwesikhatshana ngesikhathi uMoyo engezwa kuhle uMnu Mike Bimha usengusikomitshi waleli bandla.
Facebook Forum