Ibandla leMDC koBulawayo lithi selikhweze emthethwandaba ukuyaphikisa isinqumo samapholisa esokulinqabela ukuthi litshengisele kulelidolobho kusasa ngoMvulo, lisola ukubhidlika komnotho welizwe.
Amapholisa ngeSonto enqabele lelibandla ukuthi litshengisele okuyisinqumo esifana laleso asithethe eHarare ibandla leli lifuna ukutshengisela ngoLwesihlanu.
Ibandla leli lithi iziphathamandla zalo ezibotshwe izolo koBulawayo, zilokhu zivalelwe esitokisini kulelidolobho njalo zikhangelelwe ukumiswa phambi komthethwandaba ngoMvulo.
Iziphathamandla lezi zibalisa uNkosazana Thabitha Khumalo, Tendai Masocha , Helen Mpofu, Meliqiniso Sithole ,Emot Mujeri, Tinashe Matimbura loMnu. Shelton Tembo.
Amanye amalunga alelibandla atshaywa njalo abotshwa ezama ukutshengisela ngoLwesihlanu eHarare.
Umgcinisihlalo weMDC koBulawayo uMnu. James Sithole uthi bebephakathi komhlangana lamagqwetha ngeSonto ntambama, belolonga ukuphikisa isinqumo esithethwe ngamapholisa.
