Ibandla leMthwakazi Republic Party selisole kakhulu ukutshaywa lokubotshwa kwamalunga alo alitshumi ngamapholisa koBulawayo izolo.
Omunye wabatshayiweyo uMnu Welcome Moyo uthwalelwe esibhedlela seUnited Bulawayo Hospitals ekusimo esibi kuthi abanye babikwa befuthelwa esitokisini ngoba belimele kakhulu.
Lokhu kuvezwe ligqwetha labo uMnu Dumisani Dube, yena othe abantu laba balokhe bengaketheswa icala.
Amapholisa akhalise umbhobho ngesikhathi abeMthwakazi laba betshengisela phandle kwenkamba yeBulawayo Central Police Station izolo ekuseni besola ukungenelwa komkhokheli wabo uMnu Mqondisi Moyo kuthange emadubukabusa ngamapholisa efuna ukumbopha.
Kodwa uMoyo uthi wasila ngokucatsha endlini. Uthi amapholisa amethesa icala lokutshaya omunye wawo eNtabazinduna, lapho okubelengxabangxoza kubangwa ipulazi.
Ukutshengisela kwayizolo lokhu kubikwa kube lodlakela, abanye bejikela amatshe enkambeni yamapholisa njalo betshisa amathaya ezimota phambi kwalinkamba.
Isiphathamandla salelibandla uNkosazana Sithembakuye Nyoni utshele iStudio 7 ukuthi amapholisa aqale ukubatshaya bengakatshengiseli.
