Inhloko kahulumende uMnu. Morgan Tsvangirai uthi umnotho we Zimbabwe wabhidlizwa ngumongameli Robert Mugabe lebandla lakhe le Zanu PF hatshi izijeziso zenotho ezafakwa ngamazwe entshonalanga.
UTsvangairai utshele umhlangano obuqoqwe yinhlanganiso ye Center for Public Accountability imanyene le Media Institute of Southern Africa ukuthi izenzo ze Zanu PF yizo ezacobodisa umnotho welizwe.
Uthi iZanu PF isabusa yodwa yayingalandeli inhlelo eziqondileyo zentuthuko njalo ingalandeli imithetho yelizwe.
Ibandla leli lona lizivikela ngokuthi izijeziso zenotho yizo ezabulala umnotho welizwe.
Ingcwethi kwezenotho uMnu. Walter Nsununguli Mbongolwane utshele uGibbs Dube we Studio 7 ukuthi kusobala ukuthi sokulokuxokozela okumangalisayo kuhulumende womanyano.