amalinks wokungena

Breaking News

Ibandla leZanu PF Lidingisisa Ngemisebenzi Yamalunga alo Edale Lephalamende


Zanu PF

Umgcinisihlalo walelibandla, uMnu. Simon Khaya Moyo,uthi kusiyafika uZibandlela kumele amalunga ephalamende aselobufakazi bokuthi inhlelo abazisungulileyo zimi ngaphi

Ibandla leZanu PF lithi lizacubungula lidingisise ukuthi amalunga edale lephalamende awebandla lelo asungule nhlelo bani zentuthuko kunyanga ezintathu ezedluleyo.

Umgcinisihlalo walelibandla, uMnu. Simon Khaya Moyo, ubikwa liphephandaba le Chronicle esithi kumele kuthi kusiyafika inyanga kaZibandlela kumele amalunga edale lephalamende aselobufakazi bokuthi inhlelo abazisungulileyo zimi ngaphi.

UKhaya Moyo ubikwa etshele umdlalo wokuthakazelela ukungqoba kukhetho kukaMnu. Obedingwa Mguni okhethwe ukumela isigaba seMangwe ukuthi bazalandelela okuzethulwa ngamalunga la bedingisisa ukuthi kuliqiniso na kumbe hatshi.

Wengeze ethi lokhu kuzaqhubeka kuze kufike iminyaka emihlanu ukuze kubonakale ukuthi abammeli bezigaba ephalamende bayafeza na izithembiso zabo abazenza bedinga ukuvotelwa.

Ingcwethi ecubungula ezembusazwe, uMnu. Thabani Nyoni, oyisikhulumeli somanyano we Crisis in Zimbabwe Coalition utshele iStudio 7 ukuthi okwenziwa yi Zanu PF kuyabukeka kodwa udubo yikuthi ibandla leli lihlala lisethula inhlelo ezingasoze zilandelwe.

Kusenjalo, Ibandla le ZANU PF lithi lilungiselela idili ngoLwesihlanu elokudinga imali yokulungiselela umhlangano walo omkhulu owe 14th Annual National People’s Conference ozaqhutswa ngenyanga ezayo.

Isikhulumi salelibandla uMnu. Rugare Gumbo utshele intathelizindaba eHarare ngoMvulo ukuthi ibandla lakhe likhangelele ukuthola izigidi ezifika ezintathu lingathengisa amatikiti wonke ngolwesihlanu.

Amatikiti la abiza imali alentengo etshiyeneyo, esuka ku $100 000 isiya ku $200. Umsekeli kamongameli uNkosikazi Joyce Mujuru ukhangelelwe ukubangumhlonitshwa kulumbuthano.

Ngakwelinye icele umphathintambo obona ngokwethulwa kwembiko uMnu. Jonathan Moyo usole amazwe aphetsheya ngokungemukeli ukunqoba kwebandla le ZANU PF kukhetho olusanda ukwedlula.

Ukuze sihlaziye loludaba sixoxe loMnu. Morris Ngwenya, ingcwethi ecubungula ezombusazwe njalo engumsekeli webandla le ZANU PF.

UMnu. Ngwenya utshele uSithandekile Mhlanga weStudio 7 ukuthi kusobala ukuthi ibandla le ZANU PF lizabe lijabulela ukunqoba elakwenzayo kukhetho olwedluleyo, njalo sokusobala ukuthi yilo lodwa ibandla eliqinileyo kwezombusazwe ngoba awe MDC engaselamandla.

please wait

No media source currently available

0:00 0:02:18 0:00
Lapho esitholakala khona
XS
SM
MD
LG