Ibhanga le African Export and Import Bank selilobelane isivumelwano lohulumende weZimbabwe sokuthi kubunjwe isikhwama sezigidi ezilikhulu lamadola eMelika-US$100million, eyokuthengela amafekithali labalimi imitshina yokusebenza.
Isivumelwano lesi sibikwa silotshwe ngoMvulo eHarare yinhloko kahulumende uMnu. Morgan Tsvangirai, umphathintambo wezemali uMnu. Tendai Biti leziphathamandla zebhanga leli.
Uhlelo lolu lukhangelelwe ukuthi luzancedisa amafekithali labalimi ukuthenga izinto zokulungisa impahla yokuthengisa etshiyeneyo kanye lenhlanyelo.
Ingcwethi kwezenotho zithi loluhlelo lulakho ukuthuthukisa inotho ye Zimbabwe nxa lungaphathwa kahle nguhulumende.
Umsekeli womgcinisihlalo wenhlanganiso ye Zimbabwe Coalition on Debt and Development uMnu. Masimba Kuchera utshele uGibbs Dube we Studio 7 ukuthi kumele uhulumende alimuke ukuthi loluhlelo kalusoze luphazanyiswe ngamasela.
