Ibhanga elikhulu lelizwe iReserve Bank of Zimbabwe (RBZ) selifake umthetho wokuthi abantu abathengisa izindlu zabo sebezabanjelwa eyinye yemali abathengise ngayo okomnyaka wonke.
Phansi kweziqindiso lezi ezisanda kwethulwa, bayathola inkulungwane ezingamatshumi amahlanu zamadola eMelika-$50,000 kuphela nxa besanda kuthengisa izindlu.
Umthetho lo ubikwa wethulwe ngo Ncwabakazi kodwa ibhanga leli kalizange liwutshengise abamele labo abathenga bethengisa izindlu abe Estate Agents Council.
Nxa kungathengiswa indlu ngumuntu makhaza kumbe abenza lokhu beku Estate Council, kumele ibhanga lapho indlu ethengiswe khona linike lowomuntu inkulungwane ezingamatshumi amahlanu zamadola eMelika kuthi-ke eseleyo ihanjiswe ebhanga le RBZ.
Imali le izakhitshwa-ke libhanga leli kancane-kancane kuze kuphele umnyaka. Umnikazi wemali ukhangelwe ukuthi uzathola umthelo ozalwa yile imali i-interest engaba yisilinganiso sokulitshumi ekhulwini-10%, emalini eyabe ibanjwe libhanga le RBZ.
Unobhala jikelele we estate agents council, uMnu. Bennias Gweme uthi ibhanga le RBZ kalizange libikele inhlanganiso yakhe ngomthetho lo ngakho bamelele ukuzwa ukuthi kumele benzenjani ngawo.
Ingcwethi kwezenotho uMnu. Bekithemba Mhlanga uthi umthetho lo ngowokudinga imali yokuthuthukisa inotho ye Zimbabwe ngendlela eziphansi.
