Ibhanga elikhulu lelizwe iReserve Bank of Zimbabwe eseligaluliswa yizikwelede likhanya lingela mpahla lemali okungenza ukuthi livale izikwelede zalo zonke ukuze lingadiliki.
Ingcwethi ezicubungula ezemali zithi ibhanga leli lilakho ukudilika kuthi-ke zonke izikwelede elazo zibhadalwe nguzulu.
UMnumzana Nsununguli Mbongolwane ingcwethi ecubungula ezemali utshele uGibbs Dube weStudio 7 ukuthi okulempondo akufihlwa emgodleni yikho-ke osokusenza ukuthi lelibhanga lidilike.
U Mbongolwane uthi ibhanga leli laqalisa ukudilika ngesikhathi uhulumende we Zanu PF eqalisa ukwenza inhlelo ezazikhangelelwe ukuncedisa ibandla leli.
Ibhanga leRBZ liphiwe amadola eMelika ayizigidi ezilitshumi kubudget yemali yalonyaka kodwa abacubungula ezemali bathi imali le ayisoze incede ukuthi lelibhanga lingadiliki.
Kusenjalo, ingcwethi ecubungula ezemali uMnu. Eric Bloch uthi kukhanya engani iRBZ ilempahla ezinengi engazibambisa abantu lamankampani nxa ingadilika.
