amalinks wokungena

Breaking News

Ibhanga leRBZ Livalela iZimplats Ukuthi Ingasathumezeli Emazweni Imali Eyenza eZimbabwe


Ibhanga elikhulu lelizwe eleReserve Bank of Zimbabwe (RBZ) selithethe isinqumo sokuthi wonke amabhanga sokumele ukuthi ayekele ukudlelana lenkampani ye Zimbabwe Platinum Holdings eyetheswa icala lokungalandeli imithetho yokugcina imali emazweni.

UMnu. Gideon Gono usibalukhulu we RBZ ubikwa ethulele iZimplats isinqumo lesi ngoLwesine wathi akusamelanga amabhanga ayincedise ukulungisa amaphepha okuthumeza imali kwamanye amazwe.

UGono uthi iZimplats yehlulekile ukulandela umthetho owethulwa nguhulumende ngonhlolanja lonyaka wokuthi amankampani ezemigodi kumele abisele kwele Zimbabwe yonke imali ayifaka emabhanga emazweni aphetsheya.

Katshongo ukuthi inkampani le igcine imali enganani emazweni loba kukhanya ukuthi iyigcosana yaleyo eyifake emabhanga aseZimbabwe.

IStudio 7 kayenelisanga ukukhuluma labaqondisi be Zimplats lobanje bebikwa sebetholile incwadi elotshwe nguGono yesinqumo esithethwe libhanga le RBZ.

Ingcwethi kwezenotho zithi ibhanga le RBZ lephula umthetho ngenxa yokuthi kalilamvumo yokumisa amabhanga ukuthi angasebenzelani lamankampani ezemigodi angakalethi imali esemazweni kwele Zimbabwe.

Umnu. Rejoice Ngwenya eyinye yalezingcwethi uthi kumele inkampani ye Zimplats ingethuswa yizenzo zika Gono.

XS
SM
MD
LG