amalinks wokungena

Breaking News

IBosso Isikhokhela ngoMklomelo Owodwa Kuphela kuPSL


Iqembu le Highlanders selikhokhela ngomklomelo owodwa ngemva kwemidlalo yeviki lesitshumi lesithupha emidlalweni eyenguqu eyesigaba se Premier Soccer League.

Iqembu le Bosso litshiye abalandeli balo bezibuza ukuba kambe lizenelisa na ukuhluthuna isicoco se PSL sona esiphethwe liqembu le Dynamos ekupheleni kwemidlalo yalonyaka ngemva kwendlela elidlale ngayo lele Bantu Rovers emagumeni ngeNsonto.

Leliqembu litshele umoya wabalandeli balo ngokwehluleka ukukhulela ele Bantu umdlalo waze wafika emaphethelweni kungela qembu elenelise ukulitshayela emambuleni okuyimpumela edale ukuba womabili athole umklomelo owodwa ngalinye.

Ngalokho ke iqembu le Highlanders lizithole selikhokhela amaqembu aphefumulela entanyeni yalo athi ele ZPC Kariba kanye lele Dynamos ngomklomelo owodwa lona lilemiklomelo engamatshumi amathathu lanye kuthi wona elemiklomelo engamatshumi amathathu kuphela.

Kundawo yesine kuhlezi iqembu le CAPS United lona elimiklomelo engamatshumi amabili lesikhombisa lona lilandelwa ngele Hwange elilemiklomelo engamatshumi amabili lesithupha.

Iqembu le FC Platinum lihlezi kundawo yesithupha lilemiklomelo engamatshumi amabili lantathu njalo lilingene ngemiklomelo leqembu le Buffaloes.

Kundawo yethoba minwe mbili kuleqembu le How Mine elilemiklomelo engamatshumi amabili lambili kuthi ngemva kwalo kuleqembu le Chicken Inn elilemiklomelo engamatshumi amabili okulinani elilingana lele Shabanie Mine.

Iqembu le Chapungu lihlezi kundawo yetshumi lanye lilemiklomelo elitshumi lathoba munwe munye ngaphansi kwalo kuleqembu le Black Rhinos elilemiklomelo elitshumi lathoba minwe mbili.

Kundawo ezine ezingaphansi kwengalane kuleqembu le Triangle elilemiklomelo elitshumi lesikhombisa, iqembu le Harare City elilingene ngemiklomelo le Bantu Rovers kuthi emsileni kuleqembu leChiredzi elilemiklomelo elitshumi.

Sikhangele umdlalo kakhilikithi;

Nanku okwenzakale ngoMvulo ngosuku lwesibili lomdlalo phakathi kweqembu le Zimbabwe A leqembu le Afghanistan owohlobo odlalwa phakathi kwamalanga amane oqhutshelwa esigodlweni iHarare. Iqembu lezivakatshi yilo eliqale ukutshaya ibhola ekusungulweni komdlalo NgeNsonto lathola ama runs alikhulu lahlanu (105) kwathi iZimbabwe A isiphendula yathola ama runs alikhulu elilamatshumi ayisithupha lanhlanu (165).

Lawa ngamanani adala imibuzo eminengi ngengqubela phambili yomdlalo kakhilikithi kweleZimbabwe ngoba abafana basekhaya bebekhangelelwe ukuzithaphuzela kuqembu leAfghanistan lona elingasilo lamanye amazwe adlala imidlalo eyohlobo lwe Test.

Lokhu kuza ngemva kokuba iqembu leZimbabwe libe ngutshiki lobhanqa lelezivakatshi kumidlalo edlalwa iphele ngosuku olulodwa eqhutshelwe edolobheni lako Bulawayo ngeviki edluleyo lapho womabili lawa maqembu anqobe khona kumidlalo emibili phakathi kwemine.

Iqembu le Zimbabwe A leqembu le Afghanistan azaphinda edlale njalo omunye umdlalo odlalwa phakathi kwensuku ezine khona esigodlweni iHarare ekuqaleni kwenyanga kaNcwabakazi.

XS
SM
MD
LG