amalinks wokungena

Breaking News

IHighlanders Isithembe kuNkezo yeMbada Diamonds Cup


Bosso
Iqembu lenguqu eleHighlanders selithembele kufinal yenkezo eye Mbada Diamonds Cup ukuba liphutshe imidlalo yalonyaka lalo liphakamise inkezo ngemva kokwehluleka kwalo ukuthatha inkezo yeCastle Premiership League ngempelaviki edluleyo.

Iqembu leHighlanders lizadibana leqembu le How Mine ngoMgqibelo enkundleni ye Barbourfields lidinga ukunqoba leliqembu lezimbamgodi ukuze lithobe inhliziyo zabalandeli balo ezopha igazi ngemva kokuba lalonyaka iqembu labo lehluleke ukuhluthuna inkezo yeligi kuqembu leDynamos lona eseliyiphakamise kathathu iminyaka ilandelana.

Iqembu le How Mine litshaye iHighlanders laze layiphinda umphehlo emidlalweni yeligi kodwa umqeqetshi weqembu leHighlanders u Kelvin Kaindu uthi iqembu lakhe libe lomnyama kuleyo midlalo ngoba lona belidlala ngcono kule How Mine.

Iqembu elizanqoba ngoMgqibelo lizathola inkulungwane ezilikhulu lamatshumi amathathu ($130 000) kuthi elizanqotshwa lithole inkulungwane ezingamatshumi ayithoba munwe munye ($90 000).

Iqembu elizanqoba lizathola njalo usekelo lwemali kanye lokunye okuzaliphathisa ukuba liphatheke kumidlalo ye African Confederations Cup njalo lokhu ngokugoqela imvunulo kanye losizo kundleko zokuhamba kuyiwa dlala kwamanye amazwe.
Iqembu le Bosso lona alingeke lenelise ukuyamela ilizwe kumidlalo yokudinga intshantshu zezwekazi lase Africa loba lingaze linqobe ngoba lajeziswa ngokumiswa ukuphatheka kulimidlalo ngemva kokuba libhaliswe yinhlanganiso yeZifa ukuba lizamela ilizwe lona lingazimiselanga laselitshaywa ngoswazi yinhlanganiso ye Caf selingasayanga ukuyadlala

Izikolo ezintathu ezemfundo yaphezulu ezigoqela iAmhlophe, iMagwegwe kanye le iEveline kanye lezimbili ezemfundo yangaphansi ezithi i Mpumelelo kanye le Josiah Chinamano yizo ezizamela idolobho lako Bulawayo kumidlalo yalonyaka eye Youth Education through Sport eyaziwa kakhulu ngokuthi (YES Games) ezaqhutshelwa edolobheni le Masvingo ngenyanga ezayo.

Lezizikolo ziphumelele kumncintiswano eqhutshelwe esikolo seAmhlophe ngempela viki edluleyo wona obungenwe yizikolo ezingamatshumi amabili lanye.

Isikolo seEveline High School sizamela uBulawayo emdlalweni we volleyball kucele lamankazana kuthi kucele labafana kunqobe iJosiah Chinamano, iAmhlophe inqobe emdlalweni we netball kuthi iMagwegwe inqobe emdlalweni wenguqu kucele lamankazana kuthi iMpumelelo inqobe kucele labafana.
XS
SM
MD
LG