amalinks wokungena

Breaking News

Abalandeli beBosso Baqhubeka Bethakazalela Inkezo yeMbada Diamonds


Highlanders Bosso Fans(Photo by Joseph Njanji)
Highlanders Bosso Fans(Photo by Joseph Njanji)
Inkokheli zeqembu lenguqu ele Highlanders zehlise iphika ngemva kokunqoba kweqembu leli kunkezo ye Mbada Diamonds litshaya ele How Mine nge 3 ka nya okuyimpumela ethobe inhliziyo zabalandeli be Bosso ebezisopha igazi ngemva kokwehluleka kwaleliqembu ukuphakamisa isicoco seCastle Premier Soccer League.

Ekhuluma ngemva komdlalo wangoMgqibelo umqeqetshi weqembu le Highlanders uKelvin Kaindu uveze intokozo enkulu ngokuphakamisa inkezo yeMbada esithi loba kube buhlungu ukwehluleka ukuphakamisa inkezo yeligi kuyinduduzo kuye ukuphakamisa eye Mbada ngoba ilemali edlula leyo eye ligi.

Iqembu le Highlanders lithole inkulungwane ezilikhulu lamatshumi amathathu zamadola aseMelika ngemva kokunqoba kwalo lokhu njalo limali ikhangelelwe ukuba isentshenziswe ukubhadala izikwelede ezibhekane laleliqembu.
Ekhuluma emkhosini wokupha imivuzo kulabo abadlale kuhle kumncintiswano weMbada umgcinisihlalo weqembu le Highlanders uPeter Dube utshayele ihlombe abasekeli beqembu leHighlanders esithi yibo abenza leliqembu liphumelele emidlalweni yalo.

Iqembu le Highlanders liphinde lathola umvuzo wokuba liqembu ebelilembeko kwathi abadlali balo abathi uGabriel Nyoni, uNjabulo Ncube, kanye loMasimba Mambare babelane umvuzo wokuhlohla amabhola amanengi labadlali abathi uTawanda Nyamandwe we CAPS United kanye lo Silas Songani we Harare City.
UNyoni uphinde waphiwa umvuzo wokuba ngumdlali ohlohle ibhola elingene masinya kulawo wonke amanye kwathi umvuzo wokuba ngumdlali odlale okwedlula abanye kufinal uthethwe ngu Peter Rio Moyo.

UNozinti we Bosso uMunyaradzi Diya nguye okhethwe ukuba ngunozinti obambe okwedlula abanye waphinda wakhethwa ukuba nguye umdlali odlale okwedlula abanye kumncintiswano wonke.

Umgcinisihlalo weqembu leHow Mine uMlondolozi Nkomo utshayele ihlombe iqembu le Highlanders esithi lidlale ngcono kulelakhe.

Iqembu le How Mine lithole inkulungwane ezingamatshumi ayithoba munwe munye ngokufika kwalo ku final ikanti lizaphinda njalo lithole usekelo oluvela kunkampani yeMbada ukuze lenelise ukuyadlala kumncintiswano we CAF Confederation Cup.
I How Mine izamela iZimbabwe kulimidlalo ngoba iqembu le Highlanders laphucwa lelo lungelo yinhlanganiso yeCAF ngemva kokuba lingaphathekanga kumncintiswano wokudinga intshantshu zezwekazi laseAfrica eminyakeni eyadlulayo.
XS
SM
MD
LG