amalinks wokungena

Breaking News

IBosso Yehlulekile Ukuvikela Inkezo yeChibuku Super Cup


Chibuku Super Cup

Seliphelelwe ngumphako iqembu lomdlalo wenguqu ele Highlanders kumncintiswano wenkezo ye Chibuku Super Cup kodwa umqeqetshi walo uthembisa okukhulu kumidlalo yeligi.

Iqembu leHighlanders linqotshwe ngele FC Platinum nge 1 ka nya ngoMgqibelo kodwa umqeqetshi walo uMandla Mpofu uthi indlela abafana bakhe abadlala ngayo balakho ukwenza izimanga kumncintiswano weligi.

“Ngingathi mina sesibumbe iqembu elizenelisa ukuncintisa kumidlalo yeligi. Emuva siyanxiba sibili kodwa phambili indlela esidlalisa ngayo amathuba kayingithokozisi kodwa sizasebenza gadalala ukuze kuthi kuqala imidlalo yeligi sesisesimeni esihle,” kutsho uMpofu.

Amanye amaqembu adlulele kusigaba se semi – final kumncintiswano we Chibuku Super Cup ngabalisa ele Ngezi Platinum lona elinqobe ele Chicken Inn nge 2 ka 1, ele Cranborne Bullets elinqobe ele Harare City nge 2 ka 1kanye lele Dynamos elinqobe ele Black Rhinos nge 1 ka nya.

Umqeqetshi weqembu le Dynamos uTonderai Ndiraya uthi bangabe benqobile badlulela kusigaba se semi – final kodwa kusamele bezilolonge balungisise indlela abadlala ngayo.

“Kulendingeko yokuba sikhweze amasokisi silungisise okungalunganga kungakaqali imidlalo yeligi ngempelaviki ezayo.

Kuhle ukuba senelisile ukunqoba njalo sesifinyelele kusigaba esilandelayo kodwa sekumele siqale ukucabanga ngemidlalo yeligi yona ezaqala ensukwini ezilandelayo,” kutsho uNdiraya.

Inhlanganiso ye Premier Soccer League ikhuphe umbiko ensukwini ezedluleyo isithi imidlalo yeligi izaqala mhla ziyisithupha kunyanga kaLwezi njalo umncintiswano weligi uzamiswa ngenyanga kaMpalakazi kusenzelwa ukuba abadlali labo bakholise ikhefu lekhisimusi.

Imidlalo izahle imiswe kudedelwa imidlalo yokudinga intshantshu zezwekazi lase Africa ezadlalwa ekuqaleni komnyaka ize ziqhubekele phambili lowo mncintiswano ungafika emaphethelweni ngenyanga kaNhlolanja.

Facebook Forum

XS
SM
MD
LG