EleBotswana seliqinisa amanyathela eliwathathayo okubuyisela emuva abangena kulelozwe okungekho emthethweni, latshela izizalwane zalelozwe ukuthi zixotshe ezindlini, abokuza abangela maphepha aqondileyo okuhlala elizweni.
Amapholisa kanye labogatsha olubona ngokungena kwabantu kweleBotswana, baphakathi kokubamba imihlangano labahlali besigodlo salelozwe, iGaborone, phezu kodaba lokugcina abangena elizweni okungekho emthethweni.
Amapholisa athi ilizwe libhekane lohlupho lwabangena elizweni okungekho emthethweni, inengi lingabavela eZimbabwe, bebalekela isimo esibi somumo womnotho.
Udaba lolu selungenelwe la ngabaphathi ezabelweni obagoqela induna kanye lamakhansila.
Omunye ukhansila emuzini weGabane elingaphandle nje, kwedolobho leGaborone, umnunzana, Mokgotla Pule uthi amacala aseqongile njalo izakhamizi zithi lokhu kubangelwa ngabantu bokuza abangalamaphepha elizweni.
UPule lenduna uSeeletso Pule batshiya abakade bekweyinye imfa esigabeni seGabane emavikini asanda kwedlula, bebambe owangaphansi, ngesikhathi bekhuthaza izakhamizi ukuthi zixotshe abokuza abangalamaphepha okuhlala elizweni.
Amapholisa lawo asekhiphe umbiko okade uhamba ebulenjini be internet, ukhuza abantu ukuthi bengahlali labantu bokuza abangalamaphepha oqondileyo.
Lokhu sekutshiye inengi labeZimbabwe abangalamaphepha bedlalela evalweni. Ngempelaviki, izitalada bezingela banengi abavame ukuma emigwaqweni bedinga imisebenzinyanyana yokuziphilisa ebizwa ngokuthi ngamapiece jobs.
Unkosazana Edith Ndlovu uthi osekuzaba nzima yikuthi abantu sebetshelwe ukuthi bangabanikezi indawo zokuhlala uma bengelamaphepha aqondileyo. "Bekungcono ngoba besitshona sizivalele ezindlini, manje khathesi sizakuya ngaphi ngoba kuthiwa sixotshwe ezindlini?"
Umnunzana Nkululeko Moyo, yena osebenza ukulungisa ezivandeni, uthi kasahamba hambi njengakuqala ngenxa yokuqonga kwenani lamapholisa emigwaqeni.
"Ekhaya kunzima, laphandle sekunzima. Akuphumeki endlini ngitsho umuntu esiya emavinkilini, ngoba bangakubutha noma ngasiphi isikhathi."
Elinye ilunga ledale lephalamende, umnunzana Sedirwa Kgoroba, uthi sekuqonge kakhulu amacala esigabeni sakhe seMogoditshane, lapho okulabantu abeZimbabwe abanengi, ngakho sebecele ukuthi amasotsha angenele ekuhlanzeni indawo le.
"Asingeke sathi sikholisa ukuzibusa okweminyaka engamatshumi amahlanu lane, thina singakhululekanga, sesiyizibotshwa zezigebengu elizweni lethu."
Amapholisa kanye labogatsha olubona ngokungena kwabantu elizweni azaqhubeka ebamba imihlangano eGaborone lemizini eseduzane, betshela izikhamizi ukuthi bengangcini kumbe ukuqhatsha abokuza abangalamaphepha aqondileyo.
IBotswana ibuyisela emuva abeZimbabwe abafika inkulungwane, nyanga zonke, abayabe bengene elizweni okungekho emthethweni.
Ngesikhathi eleBotswana liqinisa ukubuyisela emuva abeZimbabwe, ngakwelinye icele umongameli Mokgweetsi Masisi lomunye wakhe weNamibia, umongameli Hage Geingob, bathi izizalwane zamazwe womabili sezizavunyela ukuvakatshelana zisebenzisa izithupha, hatshi amaphasiphothi.
