Iqembu leCaps United yilo eselikhokhela engalaneni yemiklomelo esigabeni seCastle Premiership Soccer League ngemva kwemidlalo yeviki lesihlanu edlalwe ngempelaviki edluleyo.
Iqembu leCaps United lilemiklomelo elitshumi lantathu ngemva kokunqoba iqembu elisemsileni wengalane ele Border Strikers nge 1 ka nya ngeSonto.
Kundawo yesibili kuleqembu le FC Platinum lona elibe ngutshiki lobhanqa 1 ka 1 lele Harare City ngoMgqibelo njalo lilemiklomelo elingene leye Caps United kodwa likundawo yesibili ngoba lihlohle amagoli amalutshwane kulalawo ahlohlwe ngabafana beMakepekepe.
Iqembu le Highlanders lihlezi kundawo yesithathu ngemva kokunqoba ele Chapungu nge 1 ka nya ngeSonto njalo lilemiklomelo elitshumi.
Ukaputeni weqembu le Bosso uFelix Chindungwe uthi ukudonsa kanye kanye yikho okudale ukuba benqobe iqembu le Chapungu.
Ngaphansi kweqembu le Bosso kulamaqembu amabili athi ele How Mine lele ZPC Kariba wona alemiklomelo eyithoba minwe mbili.
Iqembu le How Mine linqotshwe okwakuqala kumidlalo yalonyaka lapho elitshaywe khona ngele Mutare City Rovers nge 1 ka nya ngeSonto kwathi ngosuku olufanayo ele ZPC libe ngutshiki lobhanqa 2 ka 2 lele Triangle.
Iqembu le Harare City likundawo yesikhombisa lilemiklomelo eyisikhombisa okulinani elilingana lelilamaqembu ahlezi ngaphansi kwalo athi ele Ngezi Platinum kanye lele Chicken Inn.
Abafana beNgezi batshaye abeTsholotsho nge 2 ka nya ngoMgqibelo enkundleni ye White City kwathi ngosuku olufanayo abe Chicken Inn badliwe ngabe Bulawayo City nge 1 ka nya enkundleni ye Luveve.
Iqembu le Bulawayo City likundawo yetshumi lilemiklomelo eyisithupha okulinani eliphethwe liqembu elikundawo yetshumi lanye eleMutare City.
Kundawo yetshumi lambili kutholakala iqembu le Dynamos lona elilemiklomelo emihlanu njalo ngaphansi kwalo kulamaqembu amathathu alemiklomelo emine njalo lawa ngabalisa ele Chapungu, ele Tsholotsho kanye lele Hwange.
Abafana be Border Strikers yibo abajeke ingalane bengela ngitsho lowodwa umklomelo.
Kusenjalo umqeqetshi omutsha oweqembu le Chicken Inn ukhangelelwe ukwethulwa kuzulu kungakafiki olweSihlanu lapho iqembu leli elizadibana khona lele Triangle enkundleni yeLuveve.
Abazi ngokwenzakala kuqembu le Gamecocks bathi inkokheli yaleliqembu ifuna lumqeqetshi ahle aqale ukubambisana lomqeqetshi ozatshiya umsebenzi uJoey Antipas ukuze ahle ajwayelane labadlali.
