Idale le High Court selinqume ukuthi inkampani ye Air Zimbabwe sokumele ibelomqondisi ozimeleyo okhethwe yilo ozahlolisisa okwenzakala kunkampani le ekhanya ibhekane lenhlupho ezinengi nengi ezigoqela elezikwelede ezisindayo njalo isehluleka ukubhadala iholo lezisebenzi okwemnyaka embilii.
Idale leli selikhethe uMnu. Shepherd Chimutanda ingcwethi ehlolisisa ingwalo zamankampani ukuthi aqhube umsebenzi we Air Zimbabwe.
Lokhu kutsho ukubana abaqondisi be board ye Air Zimbabwe ekhokhelwa nguMnu. Jonathan Kadzura kabasavunyelwa ukusebenza kunkampani le ele zikwelede ezedlula izigidi ezilikhulu zamadola.
Sikhulumanje inkampani le imangalelwe emthethwandaba zinhlanganiso ezimele izisebenzi iNational Airways Workers Uunion kanye le Air Transport Union.
Umqondisi we Air Zimbabwe uMnu. Kadzura uthi akala lwazi lokwenzakalayo okwamanje eAir Zimbabwe njengoba engekho lasedholobheni elima epulazini lakhe alithola ngesikhathi ibandla le Zanu-PF lithathela abamhlophe umhlabathi ngomnyaka ka 2000.
Inkampani ye Air Zimbabwe isanda kumisa ukuphaphisa indizamtshina yazo kwele South Africa le Bhilithane lapho eyesaba ukuthi zingabanjwa yilabo abafuna ukubhadalwa izikwelede.
Umnu. Kucaca Phulu oyingcwethi kwezomthetho wamankampani uthi okwenziwe lidale le High Court eAir Zimbabwe kusemthethweni.
