WASHINGTON DC —
Umthethwandaba weHigh Court ngoLwesithathu unqume ukuthi ukuxotshwa kwamalunga eMDC Alliance ayisithupha edale lephalamende agoqela uMnu Tendai Biti loMnu Kucaca Phulu akukho emthethweni.
Abanye nguWilliam Madzimure, Settlement Chikwinya, Sichelesile Mahlangu loRegai Tsunga.
Amalunga la axotshiswe nguMnu Benjamin Rukanda kumaviki asanda kwedlula esithi nguye unobhala jikelele webandla labo lakudala elePeople’s Democratic Party (PDP).
Kodwa umahluli weHigh Court uJuctice Amy Tsanga unqume ukuthi uRukanda kayisilolunga lePDP, ngokunjalo ukuxotshwa kukaBiti labanye bakhe akukho emthethweni.
UMnu Phulu uthi lokhu kutsho ukuthi sebebuyela ephalamende lanxa kulabanye abathi isinqumo lesi singaphikiswa edale leSupreme Court.
