amalinks wokungena

Amalunga Ephalamende Avimba Umthetho Wezokuvota

  • Ntungamili Nkomo

Idale lephalamende leZimbabwe ngoLwesithathu lale ukwamukela umthetho wezokuvota iElectoral Bill lalaya umphathintambo wezemithetho uMnu Patrick Chinamasa ukuthi ayeguqula okuthile amalunga angasuthiseki ngakho.

Amalunga eMDC akhonona ngokutshiyeneyo kulumthetho okugoqela udaba lokuthi umuntu munye ngamunye olelungelo lokuvota kumele abhalise ukuvotela kupolling station eyodwa.

Athi lokhu kwenza kube lula kulabo abangaba lenjongo yokuvimba abanye ukuthi bengavoti.

Ngalokho, abeMDC laba bafuna abantu bavunyelwe ukuvotela yiloba ngaphi kuma Ward abayabe bebhalise kuwo.

Umthetho lo uzaphenduka njalo edale ngoLwesine. NgoLwesibili khona lelidale lipase umthetho obona ngezamalungelo oluntu iHuman Rights Commission Bill.

Okudanise abanengi yikuthi amalunga eMDC lawo avumile ukuthi umthetho lo upase lanxa umumethe okunengi okusolisayo, okugoqela udaba lokuthi ikomishini yezamalungelo oluntu ingahlaziyi udlakela lweGukurahundi lolwenzakale ngo2008.

Ummeli weInsiza South uMnu Siyabonga Malandu Ncube loMnu Felix Magalela Mafa Sibanda, abamacele womabili eMDC yibo bodwa abaphikise lumthetho bala ukuwuvotela.

Ingcwethi kwezombusazwe uMnu Dumisani Nkomo laye usole kakhulu amalunga eMDC ngokuvumela ukupasiswa kwalumthetho.

XS
SM
MD
LG