Ikhomithi yedale lephalamende ebona ngemfundo ephezulu leyemakolitshini ithi izakwethulela lelidale ngoLwesithathu impumela yokudingisisa ekwenzileyo ngokuqonga kwembadalo yama fees ngesilinganiso esedlula amakhulu amabili lamatshumi amahlanu 250 percent ekhululwini.
Umgcinisihlalo walikhomithi, uNkosazana Lindiwe Maphosa utshele iStudio 7 ukuthi kasoze akhulume okunengi ngaloludaba bengakethuli umbiko lo.
Izifundi zakhonona ngembadalo le ephalemende ngenyanga edluleyo, njalo umphathintambo kahulumende obonga ngezemfundo ephezulu leyemakolitshini uMnu. Amon Murwira wayenxusiwe. Asenelisanga ukukhuluma loMnu. Murwira ngaloludaba.
Abazali bathi abasoze benelise imali edingakalayo njalo ezinye izifundi zizehluleka ukuqhubekela phambili ngemfundo.
Ukuhlaziya loludaba, sixoxe lengcwethi ecubungula ezemfundo uMnu. Thandeko Zinti Mnkandla.
