Idale leSenate likhangelelwe ukuvota ngoLwesibili lisamukela ukuguqulwa kwesisekelo sombuso welizwe okwenziwe lidale leHouse of Assembly ngeviki edluleyo phansi kweConstitutional Amendment Bill No. 2.
Amalunga eZanu PF laweMDC-T ekhokhelwa nguMnu Douglas Mwonzora asolwe ngabanengi ngemva kokupasisa liBill ngoba besithi ipha uMongameli Emmerson Mnangagwa amandla amanengi.
Ingapasa iBill le kuSenate, izakuya kuMnangagwa ayisayine.
Phansi kwalinguquko uMnangagwa uba lamandla okukhetha abahluleli bemithethwandaba bengazange bavivinywe nguzulu njengalokhu obekusenziwa.
Yesula njalo umugqa wokuthi abasekeli bakaMongameli kumele bakhethwe nguzulu.
UNkosazana Thokozani Khupe lamanye amalunga eMDC-T amathathu babambane labeMDC Alliance kaMnu Nelson Chamisa kuHouse of Assembly bayala ukwamukela linguquko. KuSenate kusasa lakho kukhangelelwe ukuba lamalunga ebandla likaMwonzora ambalwa azakwala ukwamukela linguquko.
Kodwa malutshwana njalo kasoze enelise ukuyivimba lanxa engaze exhasane laweMDC Alliance njengalokhu okwenzakale kuHouse of Assembly.
Ingcwethi kwezombusazwe uMnu Effie Dlela Ncube utshele iStudio 7 ukuthi kuyadanisa ukuba isisekelo sombuso welizwe sesiguqulwa sona singakasetshenziswa ngokugcweleyo.
