amalinks wokungena

I Supreme Court Ilaya uMugabe Ukuthi Ahlele IIanga Lama By-elections

  • Ntungamili Nkomo

Umthethwandaba waphezulu owe leSupreme Court ngoLwesine unqume ukuthi uMongameli Robert Mugabe kumele ahlele ilanga okuzakwenziwa ngalo ukhetho lokudinga abammeli beNkayi South, Bulilima East leLepane East ephalamende.

Umthethwandaba lo ulahle isicelo sikaMugabe sokuthi wesule isinqumo esethulwe yiHigh Court nyakenye esithi kumele abeke ilanga lokhetho ezigabeni ezintathu lezi.

Esethula isinqumo sakhe, uMahluli Godfrey Chidyausiku uthe uMugabe kumele alobe kugwalo lwe-government gazzette kungakedluli umhlaka 30 ngenyanga ezayo ukuthi sokumele kuqhutshwe amaBy-elections ezigabeni lezi.

Indawo ezintathu lezi zisele zingela bammeli kulandela ukuxotshwa kukaMnu Abednico Bhebhe, uNorman Mpofu loNjabuliso Mguni kuMDC ekhokhelwa nguMnu Welshman Ncube ngo2009.

Kulandela ukwedlula kwesikhathi ama by-elections ayemele enziwe ngaso, abathathu laba bacela iHigh Court ukuthi ibambe uMugabe ngamandla ukuthi ehlele lolukhetho.

Lakanye lelidale lavumelana labo, kodwa uMugabe waphikisa isinqumo lesi eSupreme Court yona ehluze loludaba ngeviki ephelileyo yasisethula isinqumo sayo ngoLwesine.

Umthetho uthi kusukela ngelanga igazzette eyabe iphume ngalo, umthethwandaba weNomination Court kumele wamukele amagama alabo abafuna ukuncintisa, kungakedluli amaviki lamathathu.

Kusukela ngelanga leNomination Court, ukhetho luyabe lumele lwenziwe kungakedluli amalanga angamatshumi amahlanu, kuchasise igqwetha elimela uBhebhe labanye bakhe uMnu Ndabezinhle Mazibuko.

UMnu Bhebhe yena utshele lumsakazo ukuthi ujabule kakhulu ngesinqummo lesi. Uthe sekhangelele ukuthi lihlelwe ilanga lokhetho.

Ukuhlaziya loludaba sixhume ingcwethi kwezombusazwe uMnu Effie Dlela Ncube loMnu Nkululeko Sibanda bona abathi uMugabe ulakho ukungasilandeli lesisinqumo.

XS
SM
MD
LG