amalinks wokungena

Breaking News

Abalandeli beHighlanders Bathi Idliswe nguNompembe iBosso


Dynamos vs Highalnders

Kube lezehlakalo ezilakho ukuphazamisa isimo somdlalo wenguqu kweleZimbabwe kuviki yetshumi lane kusigaba se Premier Soccer League ngemva kokuba ngoMgqibelo umdlalo obuphakathi kweqembu le Chicken Inn lele Dongo Sawmills ungasafikanga emaphethelweni ngenxa yesenzo sodlakela ebesiqondiswe kudokotela weqembu le Dongo. Kwathi ngeSonto unompembe wabambela iqembu le Highlanders ilanga libalele emdlalweni obusenkundleni ye Rufaro.

Umdlalo obuphakathi kweqembu elihlezi phezu kwengalane yemiklomelo kusigaba se PSL ele Chicken Inn lele Dongo Sawmill obusenkundleni ye Luveve ngoMgqibelo awusafikanga emaphethelweni ngemva kokuba umqeqetshi wabonozinti kuqembu le Chicken Inn uJulius Ndlovu etshaye udokotela weqembu le Dongo ngesigubhu sekulihlandla lesibili lomdlalo.

Iqembu le Dongo liyale ukuqhubekela phambili ngalumdlalo ngemva kokuba udokotela walo ethwalelwe esibhedlela ikanti uNdlovu yena uhle wabotshwa ngamapholisa ngemva kwesenzo sakhe sodlakela.

Lumdlalo umiswe iqembu le Chicken Inn likhokhela ele Dongo Sawmills nge 1 ka nya.

Inhlanganiso ye PSL yiyo esizahlazulula ukuba kwenzakaleni ngalumdlalo ngemva kokuthola imibiko evela kunompembe obephethe lumdlalo.

Lokhu kutsho ukuba iqembu le Chicken Inn lizayala lilokhu lilemiklomelo engamatshumi amabili lathoba munwe munye ngemva kokudlala imidlalo elitshumi lantathu.

Iqembu elihlezi kundawo yesibili ngele Triangle lona elilemiklomelo engamatshumi amabili lesikhombisa ngemva kokunqoba iqembu le ZPC Kariba nge 1 ka nya ngeSonto.

Kundawo yesithathu kuhlezi iqembu le Dynamos lona elinqobe ele Highlanders nge 3 ka 2 ngeSonto emdlalweni obusenkundleni ye Rufaro.

Limpumela itshiye inengi labalandeli beqembu le Highlanders bezonde begane unwabu becaphukele unompembe uNorman Matemera ngemva kokuba iqembu le Highlanders lenelise ukulitshayela emambuleni okwesithathu kodwa unompembe wayala okutsho ukuba lumdlalo ubungafika emaphethelweni zingutshiki lobhanqa 3 ka 3.

Unompembe uMatemera nguye njalo owake wangezelela imizuzu yaze yaba yisikhombisa eminyakeni edluleyo ngesikhathi umdlalo usufike kumizuzu engamatshumi ayithoba munwe munye iqembu leHighlanders likhokhela 1 ka nya ele Dynamos lacina lilinganisa umdlalo waphela sekuyi 1 ka 1.

Iqembu le Dynamos lilemiklomelo engamatshumi amabili lesithupha njalo ukunqoba kwalo kutsho ukuba leliqembu liqhubekela phambili lidlisa ele Highlanders luklubhu njengoba sekuleminyaka eyithoba minwe mbili lacina ukunqoba ele DeMbare.

Owake wadlalela iqembu le Highlanders osedlalela iqembu le Witbank Spurs kwele South Africa uPeter Rio Moyo uthi kuyadingakala ukuba abadlali be Bosso bathole okungabakhuthaza ukuba bedlale ngamadlabuzane nxa bedlala leqembu le Dynamos.

Kundawo yesine kuhlezi iqembu le How Mine lona elilemiklomelo engamatshumi amabili lanhlanu kuthi ngemva kwalo kuleqembu le Chapungu elilemiklomelo engamatshumi amabili lambili.

Iqembu le FC Platinum likundawo yesithupha lilemiklomelo engamatshumi amabili lanye njalo lilingene ngemiklomelo lamaqembu athi ele Harare City kanye lele Caps United wona ahlezi ngemva kwalo engalaneni.

Kundawo yethoba munwe munye kuhlezi iqembu le Highlanders elilemiklomelo elitshumi lathoba munwe munye kuthi kundawo yetshumi kuleqembu le ZPC Kariba elilemiklomelo elitshumi lanhlanu njalo lilingene ngemiklomelo leqembu le Buffaloes.

Iqembu le Hwange likundawo yetshumi lambili lilemiklomelo elitshumi lane kuthi ngemva kwalo kuleqembu le Whawha elilemiklomelo elitshumi lambili.

Kundawo yetshumi lane kuleqembu le Tsholotsho lona elilemiklomelo elitshumi lanye ndawonye lele Flame Lily kuthi ngaphansi emsileni wengalane kuleqembu le Dongo Sawmills elilemiklomelo eyisikhombisa.

………………………………

Sikhangele umdlalo kakhilikithi;

Inhlanganiso ebona ngokuqhutshwa komdlalo kakhilikithi kwele Zimbabwe eye Zimbabwe Cricket isikhuphe umbiko wokuba ilizwe le India lizaphumelela ukuzodlala kwele Zimbabwe ngenyanga ezayo loba nje bekulokwesabela ukuba limidlalo ayisoze ibekhona ngenxa yokungezwani phezu kwezimali zokuba limidlalo iphume kuma bonakude.

Imibiko ephuma ezihlengeni ze West Indies lapho umgcinisihlalo wenhlanganiso ye Zimbabwe Cricket uWilson Manase kanye lesiphathamandla salinhlanganiso u Wilfred Mukondiwa abangena umhlangano we International Cricket Council oweminyaka yonke ithi inkonkheli lezi sezixoxisane zazwanana lenkokheli zomdlalo kakhilithi kwele India njalo iqembu le India lizafika kwele Zimbabwe mhla ziyisikhombisa kunyanga kaNtulikazi.

Amaqembu athi ele Zimbabwe kanye lele India azadlala imidlalo emithathu eyohlobo lwe One Day International kanye lemibili eyohlobo lwe Twenty20 kusukela mhla zilitshumi ngenyanga ezayo.

Ngenyanga kaNcwabakazi iqembu le West Indies lizavakatshela kwele Zimbabwe ndawonye lele Pakistan ukuzophatheka kumidlalo leqembu elimela ilizwe le Zimbabwe.

XS
SM
MD
LG