Ukonakala komnotho weZimbabwe sokuphambanise kakhulu umkhankaso wokulwisana lokuhlukuluzwa kwabomama ezindlini, idomestic violence.
Lokhu kuvezwe ngumkhokheli wenhlanganiso ekhankasela amalungelo abantwana, iTag A Life International, uNyari Mashayamombe, ekhuluma eWashington DC ngoLwesine.
UNkosazana Mashayamombe ubekhuluma emhlanganweni obuqoqwe yinhlanganiso yeCenter for International Private Enterprise obukhangela ubudlelwano obukhona phakathi kwesimo somnotho lokuhlukuluzwa kwabesifazana.
UMashakamombe uthe kulula kakhulu ukuthi kube lokuxabana phakathi kukababa lomama endlini nxa imali isilela njengokwenzakalayo kathesi eZimbabwe.
Wengeze wathi kulesidingo sokuthi uhulumende akhulumisane lozulu kudingwe indlela zokuvuselela umnotho.
UNkosazana Mashayamombe uqhuba izifundo zakhe kunhlanganiso yeNational Endowment for Democracy, eWashington DC.
Omunye wabakhulume emhlanganweni lo nguNkosikazi Susan May, osebenzela ugatsha olubona ngokudlelana kweMelika lamanye amazwe.
UNkosikazi May uvumelane loMashayamombe, esithi ukuze kuqedwe udaba lokuhlukuluzwa kwabesifazana - kungaba yikuliphi ilizwe - kumele abesifazana babe lendlela zokuzikhusela njalo umnotho umi kuhle.
