Iqembu lomdlalo wenguqu ele Dynamos yilo lodwa iqembu elingelinye lamaqembu alodumo elizweni elehluleke ukuchapha esigabeni sakuqala esomncintiswano weChibuku Super Cup ngemva kwemidlalo ebikhona ngempelaviki.
Iqembu leDynamos likhutshwe kunkezo ye Chibuku liqembu le Black Rhinos ngeNsonto okuyimpumela eze ngemva kokuba abadlali beqembu leDeMbare bengalungiselelanga kuhle lumdlalo kungoba bebekhalala umsebenzi bekhonona ngemali abazikweledwa liqembu.
Iqembu le Rhinos lona eselidlala kuhle kakhulu selokhu liqale ukuqeqetshwa ngu Jostein Mathuthu lidlulele kusigaba esilandelayo esomncintiswano ndawonye le CAPS United, iHarare City, i FC Platinum, iHighlanders, iTriangle, iChiredzi kanye le How Mine.
Iqembu le Dynamos lamanye ayehluleke ukudlula kusigaba sakuqala esomncintiswano agoqela iChapungu, i ZPC Kariba, iBantu Rovers, iShabanie Mine, iHwange, iBuffaloes kanye le Chicken Inn azathola inkulungwane ezilitshumi lanhlanu zamadola aseMelika.
Amaqembu azaphelela kusigaba se quarter – final azathola inkulungwane ezingamatshumi amabili kuthi azafinyelela kusigaba se semi-final azaphiwa inkulungwane ezingamatshumi amabili lanhlanu kubesekusithi iqembu elizanqotshwa ku final lizathola inkulungwane ezingamatshumi amahlanu ikanti elizaphakamisa inkezo lizathola inkulungwane ezingamatshumi ayisikhombisa lanhlanu.
*******************************************
Sikhangele okwenzakale emdlalweni wenguqu elizweni le South Africa laseNgilandi ngempelaviki edluleyo;
Amaqembu alandelwa ngabanengi elizweni le South Africa athi ele Kaizer Chiefs kanye lele Orlando Pirates asefake unyawo olulodwa ku final eyenkezo ye MTN8 ngemva kwemidlalo eyehlandla lakuqala eyesigaba se semi-final edlalwe ngempelansonto edluleyo.
Iqembu le Chiefs litshaye ele Platinum Stars nge 2 ka nya ngoMgqibelo kwathi ngeNsonto iPirates layo yatshaya iBidvest Wits ngempumela efanayo.
Womabili lawa maqembu abedlala engekho ekhaya okutsho ukuba amathuba awo okudlulela kusigaba esilandelayo mahle ngoba limiklomelo ayihlohlileyo ilakho ukubalwa ngokuphindiweyo kuhlandla lesibili.
NgaseNgilandi imidlalo yeligi isuke yahlala ngempelaviki edluleyo njalo kulamaqembu ayisikhombisa ayenelise ukuthola yonke imiklomelo emithathu ngosuku lwakuqala lwemidlalo.
Lawa ngagoqela iqembu eliphakamise isicoco kusizini edluleyo ele Manchester City kanye lalelo eliqede likundawo yesibili ele Liverpool ikanti amanye anqobileyo ngathi ele Arsenal, iAston Villa, iHull City, iTottenham kanye le Swansea yona edanise abalandeli beqembu le Manchester United ebelidlala kuhle emidlalweni yokuzwana amandla eliyidlale phambilini kokuqala kwemidlalo yeligi.
**********************************
Iqembu elimela ilizwe leZimbabwe emdlalweni kakhilikithi lizadibana lelimela ilizwe le South Africa emdlalweni wesibili owohlobo lwe One Day International enkundleni ye Queens Sports Club koBulawayo kusasa ngoLwesibili.
Umdlalo wakuqala owohlobo lwe ODI odlalwe ngeNsonto uphele iqembu le South Africa linqobe nge 93 runs okutsho ukuba iqembu le Zimbabwe kumele linqobe emdlalweni wesibili ukuze livikele ukuhle lehlulwe kungakadlalwa umdlalo wesithathu wona ozadlalwa ngoLwesine khona njalo enkundleni yeQueens Sports Club.