amalinks wokungena

Breaking News

I-Dynamos Isesimeni Esihle Esokuphakamisa Isicoco sePremier Soccer League


Dynamos FC

Iqembu lomdlalo wenguqu ele Dynamos lisesimeni esihle esokuphinda liphakamise njalo isicoco se Premier Soccer League lonyaka loba nje lehluleke ukunqoba ngempelansonto edluleyo.

Imidlalo ye Premier Soccer League edlalwe ngempelaviki edluleyo itshiye iqembu elihlezi esiqongweni sengalane yemiklomelo ele Dynamos lilemiklomelo engamatshumi amahlanu njalo likhokhela elihlezi kundawo yesibili ele ZPC Kariba ngemiklomelo elithathu.

Iqembu leDeMbare lidlalise ithuba lokuba livule isikhala esikhulu phakathi kwalo lamaqembu alilandela ngemuva njengoba lidlale ngeNsonto livele selikwazi ukuba iqembu le ZPC Kariba linqotshwe ngele FC Platinum ngoMgqibelo kodwa lenelisa ukuthola umklomelo owodwa ngemva kokuba libe ngutshiki lobhanqa leqembu 1 ka 1 le Chapungu.

Kundawo yesithathu engalaneni yemiklomelo kuleqembu le CAPS United lona elilemiklomelo engamatshumi amane lanhlanu.

Womathathu lawa maqembu yiwo akhangelelwe ukuba angaphakamisa inkezo ye PSL kodwa nxa kukhangelwa imidlalo eseleyo ele ZPC Kariba kusemandleni alo ukuba lingaphakamisa isicoco njengoba lizadlala lawo womabili amaqembu elincintisana lawo.

Sikhangele ukuba imidlalo emine esele ukuba idlalwe yilawa maqembu imi njani; Iqembu le Dynamos lizadlala lamaqembu athi ele Harare City, ele Bantu Rovers, ele ZPC Kariba kanye lele How Mine.

Iqembu le ZPC Kariba lizadlala lamaqembu agoqela ele Buffaloes, ele Harare City, ele Dynamos kanye lele CAPS United.

Ele CAPS United lona lizadlala lele FC Platinum, ele Buffaloes, ele Harare City kanye lele ZPC Kariba.

Kusenjalo abalandeli beqembu le Highlanders sebesesabela ukuba iqembu labo lingazithola selibhekane lengozi eyokugunyulwa kusigaba saphezulu ngemva kokunqotshwa elikwenziwe ngele Chicken Inn nge 1 ka nya ngeNsonto.

Limpumela itsho ukuba iqembu le Bosso selidliwe emidlalweni emihlanu eyeligi ilandelana okuyisimo esesidale ukuba lehle liyehlala kundawo yesikhombisa engalaneni yemiklomelo.

………………………………………………………………………………………………………………………………………………………………………………………………………………………………………………………………………………………………………………………..

Sikhangele imidlalo yenguqu edlalwe kwamanye amazwe;

Amaqembu athi ele Mamelodi Sundowns, ele Orlando Pirates, ele Supersport kanye lele Platinum Stars yiwo asefinyelele kusigaba se semi-final esomncintiswano we Telkom Knockout ngemva kwemidlalo eyesigaba se quarter – final ebikhona ngempelaviki edluleyo.

Iqembu le Platinum Stars litshaye ele Kaizer Chiefs nge 5 ka 3 ngemva kokutshaywa kwembekwa kuthi iqembu le Pirates libhaxabule ele Ajax Capetown nge 4 ka 1, kuthi iSundowns inqobe iqembu le AmaZulu nge 2 ka 1 ikanti iqembu le Supersport litshaye ele Bidvest Wits nge 2 ka 1.

Kusigaba se semi – final iqembu le Sundowns lizadlala lele Platinum Stars kuthi ele Orlando Pirates lingqikilane lele Supersport.

Kusenjalo unozinti weqembu le Orlando Pirates kanye leqembu elimela ilizwe le South Africa uSenzo Meyiwa udutshulwe wafa ngesikhathi izikliwi zigqekeza indlu yomculi uKelly Khumalo endaweni ye Vosloorus eGauteng ngeNsonto ntambama.

Lumdlali obeleminyaka yokuzalwa engamatshumi amabili lesikhombisa ubengukaputeni weqembu le Pirates kanye lele Bafana Bafana njalo uphatheke kumdlalo weqembu le Pirates lele Ajax Capetown ngoMgqibelo.

NgaseNgilandi iqembu elihlezi phezu kwengalane ele Chelsea libe ngutshiki lobhanqa lele Manchester United 1 ka 1 okuyimpumela elitshiye lilemiklomelo engamatshumi amabili lantathu okutsho ukuba selikhokhela iqembu elihlezi ngemva kwalo ele Southampton ngemiklomelo emine.

Impumela emangalise abalandeli bomdlalo wenguqu yaseNgilandi ngeyokunqotshwa kweqembu eliphethe isicoco seligi ele Manchester City nge 2 ka 1 ngele West Ham ngoMgqibelo.

Elizweni le Spain iqembu le Barcelona linqotshwe okwakuqala kulisizini lapho litshaywa nge 3 ka 1 ngele Real Madrid okuyimpumela elitshiye lilingene ngemiklomelo engamatshumi amabili lambili lele Sevilla elihlezi kundawo yesibili engalaneni kuthi iqembu le Real Madrid likundawo yesithathu lilemiklomelo engamatshumi amabili lanye.

………………………………………………………………………………………………………………………………………………………………………………………………………………………………………………………………………………………………………………………….

Emidlalweni engasiyo yenguqu umdlali we golf wase Zimbabwe uBrendan De Jonge uqede ekundawo yesithathu kumncintiswano we McGladrey Classic ngemva kuka Robert Streb lo Will Mackenzie ngemva kokuba laba badlali bengene ku play –off eyokudinga intshantshu ngoba beqede imidlalo yabo belingene ngemiklomelo uStreb wasephumelela.

Emdlalweni we tennis umdlali wase Zimbabwe uCara Black lomunye wakhe uSania Mirza oyisizalwane se India baphakamise isicoco se WTA kumncintiswano owokugqiba isizini ngemva kokunqoba uHsieh Su – Wei lo Peng Shuai abayizizalwane zase China.

XS
SM
MD
LG