Iqembu le Dynamos lihluthune isicoco se Castle Premier Soccer League ezandleni zeqembu le ZPC Kariba ngosuku lokucina olwesizini yalonyaka.
Iqembu le ZPC Kariba liphunyukwe yisicoco seligi ngemva kokunqotshwa elikwenziwe ngele CAPS United nge 3 ka 2 okuyimpumela edale ukuba lihwithwe ngele Dynamos ngelanga lokucina elesizini yalonyaka.
Iqembu le ZPC lingene kumidlalo yangempelaviki lihlezi phezu kwengalane lidinga ukuba libe ngutshiki lobhanqa leqembu le CAPS United ukuze liphakamise inkezo emnyakeni walo wakuqala owokudlala kusigaba saphezulu.
Lokhu kwehlule ngemva kokuba lona lidliwe kwathi ele Dynamos lanqoba ele How Mine nge 2 ka nya okuyimpumela ekhuphule inani lemiklomelo yeDeMbare laya kumatshumi amahlanu lesikhombisa ikanti iqembu le ZPC lona liqede lilemiklomelo engamatshumi amahlanu lesithupha.
Imibiko ephuma esigodlweni ithi umqeqetshi weqembu le Dynamos uKallisto Pasuwa wazise intatheli ukuba uyehlukana leqembu leli ekupheleni komnyaka kungoba ufuna ukuke ahlabe ikhefu.
UPasuwa nguye obeqeqetsha iqembu le Dynamos eminyakeni emine edluleyo lapho eliphakamise khona isicoco se PSL iminyaka ilandelana kodwa ubudlelwano bakhe lenkokheli yeqembu bebungekho mnandi.
Ngaphansi kwengalane amaqembu agunyuliweyo azabe edlala kusigaba sika division one ngomnyaka ozayo ngathi ele Chiredzi, ele Bantu Rovers, ele Black Rhinos kanye lele Shabanie Mine.
Kusenjalo abagadli abathi uCharles Sibanda oweqembu le Highlanders kanye lo Kudakwashe Musharu oweqembu le How Mine yibo abaphutshe imidlalo yalonyaka behlohle kanengi ukwedlula abanye abadlali bobabili behlohle imiklomelo elitshumi lambili ngamunye.
Kesizwe nangu umfoka Sibanda ekhuluma phezu kwalokhu kanye lokukhethwa kwakhe ukuba ngomunye wabadlali abalitshumi lanye abadlale kuhle lonyaka.
Abanye abadlali abakhethwe kuluhlu lwalabo abadlale kuhle lonyaka ngabathi uStephen Alimenda kanye lo Themba Ndlovu abeqembu le Dynamos, uLimited Chikafa, uDennis Dauda kanye lonozinti uTendai Hove abeqembu le ZPC Kariba, uThabani Kamusoko oweqembu le FC Platinum, uDavid Kutyauripo oweqembu le Harare City, uEvans Rusike oweqembu le Hwange, uTendai Samanja oweqembu le CAPS United kanye lo Musharu.
**********************************************************************************
Sikhangele ukuba amaligi amanye amazwe ami njani ngemva kwemidlalo ebikhona ngempelaviki;
Elizweni le South Africa iqembu le Kaizer Chiefs likhokhela ngemiklomelo elitshumi lanye phezu kwengalane njengoba lilemiklomelo engamatshumi amabili lathoba munwe munye kuthi elingemva kwalo ele Ajax Cape Town lilemiklomelo elitshumi lathoba minwe mbili.
Wonke amaqembu adlala ku ABSA Premiership asedlale imidlalo elitshumi lanye.
Ngase Ngilandi iqembu le Chelsea liqhubekela phambili litshaya eziwayo njalo lihlezi phezu kwengalane lilemiklomelo engamatshumi amathathu lambili ngemva kwemidlalo elitshumi lambili.
Elizweni le Spain iqembu le Real Madrid yilo elihlezi phezu kwengalane lilemiklomelo engamatshumi amathathu ngemva kwemidlalo elitshumi lambili kuthi ngemva kwalo kuhlezi iqembu le Barcelona elilemiklomelo engamatshumi amabili lathoba minwe mbili.
************************************************************************************
Iqembu elimela ilizwe le Zimbabwe emdlalweni kakhilikithi liqhubekela phambili lidonsa nzima elizweni le Bangladesh njengoba selinqotshwe emidlalweni emibili eyohlobo lwe One Day International.
Emdlalweni wakuqala odlalwe ngoLwesihlanu olwedluleyo iqembu le Zimbabwe litshaywe ngama runs angamatshumi ayithobaminwe mbili lesikhombisa (87) kuthi emdlalweni odlalwe ngeNsonto iqembu le Bangladesh linqobe ngama runs angamatshumi ayisithupha lathoba minwembili (68).
Umdlalo wesithathu uzadlalwa ngoLwesithathu njalo iqembu le Zimbabwe kuzamele livikele ukudliwa kiwo ukuze liyale lilokhu lilethuba lokunqoba kumidlalo ye ODI ngemva kokunqotshwa kabuhlungu kumidlalo eyohlobo lwe Test leye Twenty20 liqembu elifanayo.