Iqembu lenguqu ele FC Platinum selivule isikhala semiklomelo emine engalaneni yesigaba se Castle Lager Premier Soccer League, ngemva kwemidlalo yange mpelaviki edluleyo.
I-FC Platinum ithe ngokunqoba ekwenze i- Bulawayo City nge 1 ka nya ngoMgqibelo yakhuphula inani lemiklomelo elilayo yaba ngamatshumi amathathu lesithupha.
Endaweni yesibili kuhlezi iqembu leCaps United lona elinqobe ele Highlanders nge 1 ka nya ngeSonto njalo elilemiklomelo engamatshumi amathathu lambili.
Iqembu le Highlanders lehle layahlala kundawo yesithathu lilemiklomelo engamatshumi amathathu lanye.
Kundawo yesine kuleqembu leDynamos lona elilemiklomelo engamatshumi amabili lesithupha njalo elibe ngutshiki lobhanqa 0-0 lele ZPC Kariba lona elikundawo yesihlanu lilemiklomelo engamatshumi amabili lane.
Iqembu le Triangle likundawo yesithupha njalo lalo lilemiklomelo engamatshumi amabili lane.
Kundawo yesikhombisa kuleqembu le Chicken Inn elinqobe ele Harare City nge 2 ka nya njalo lilemiklomelo engamatshumi amabili lambili.
Ngaphansi kwe Chicken Inn kuleqembu le Ngezi Platinum lona elibe ngutshiki lobhanqa 0-0 leqembu le Triangle.
Kundawo yethoba munwe munye kuhlezi iqembu le Hwange lona elinqobe ele Tsholotsho nge 1 ka nya njalo elilemiklomelo engamatshumi amabili lanye.
Ngaphansi kwe Hwange kulamaqembu amathathu alemiklomelo engamatshumi amabili njalo lawa ngabalisa ele Harare City, ele How Mine kanye lele Bulawayo City.
Iqembu le Chapungu likundawo yetshumi lantathu lilemiklomelo elitshumi lathoba munwe munye njalo libe ngutshiki lobhanqa 0-0 lele Mutare City.
Kundawo yesithathu usuka ngaphansi kwengalane kuleqembu le Tsholotsho lona elilemiklomelo elitshumi lambili okulinani eliphethwe liqembu elihlezi kundawo yesibili nxa usuka emsileni ele Mutare City.
Ngaphansi kwengalane kuhlezi iqembu le Border Strikers lona elilemiklomelo eyisikhombisa njalo elibe ngutshiki lobhanqa 1 ka 1 lele How Mine ngoMgqibelo.
****************
Sikhangele umdlalo weSquash, uChristo Potgieter oyisizalwane selizwe le South Africa nguye onqobe kucele labesilisa kumncintiswano walonyaka owe Safeguard Zimbabwe Open Squash Championships oqhutshelwe edolobheni lako Bulawayo ngempelaviki edluleyo.
UPotgieter unqobe uSchlebusch laye oyisizalwane selizwe le South Africa.
Onqobe kucele labesifazane ngu Zoe Hall oyisizalwane selizwe le Ireland yena onqobe uYvonne Mubure owase Zimbabwe.
Phambilini kokudibana kumdlalo we final uPotgieter lo Schlebusch bamanyane baphakamisa inkezo kumncintiswano wama doubles ngemva kokunqoba abakwenze uMike Burns lo Neil Nesbitt abase Zimbabwe.
**************
Iqembu labesifazane elimela ilizwe emdlalweni wenguqu ele Mighty Warriors ngoLwesithathu lizadlala umdlalo walo wakuqala kumncintiswano we Olympics elizweni le Brazil.
Iqembu le Mighty Warriors lizadibana leqembu le Germany emdlalweni wesibaya sika Group F njalo umqeqetshi walo uShadrack Mlauzi uthi umdlalo wokuzwana amandla leqembu lase China ekufikeni kwabo kwele Brazil ubasize ukuba belungisise amaphutha abo.
“Amankazana adlale kuhle lapho sidlala leqembu le China loba nje beqale bengani bayethukile imbangela mhlawumbe kuyikuba bekungokwakuqala ukuba bedlale leqembu elikuzinga laphezulu. Okwakhathesi sekumele sibhekane lomdlalo wethu leqembu lase Germany wona ongasoze ube lula kodwa umdlalo wethu leqembu le China usiphathise ukuba silungisise lapho okumele silungisise khona.
Komunye umdlalo wesibaya sika Group F iqembu le Canada lizadibana lele Australia.
Umncintiswano wenguqu uqala mhla zintathu kunyanga kaNcwabakazi loba nje ngokusemthethweni imidlalo ye Olympics kuthiwa izaqala mhla zinhlanu kusiyafika mhla zingamatshumi amabili lanye kunyanga kaNcwabakazi.
Umkhosi wokuvulwa kwalimidlalo okusemthethweni uzaqhutshwa ngoLwesihlanu mhla zinhlanu kuNcwabakazi.
