amalinks wokungena

Breaking News

I-Dynamos leHighlanders Azangqikilana kuFinal yeZNA Commanders’ Charity Shield


Dynamos vs Highalnders

Amaqembu enguqu athi ele Dynamos kanye lele Highlanders yiwo asefinyelele kufinal yalonyaka eyenkezo ye ZNA Commanders’ Charity Shield ngemva kwemidlalo yesigaba se semi final ebikhona ngeSonto.

Iqembu le Highlanders likhulele ele How Mine nge 1 ka nya emdlalweni obusenkundleni yeBarbourfields kuthi ele Dynamos lona litshaye ele Caps United nge 2 ka 1 esigodlweni iHarare.

Limpumela itsho ukuba iDynamos le Highlanders yizo esezizadibana kufinal ngosuku olukhona luzaziswa njalo iqembu elizanqoba lapho lizathola inkulungwane ezilitshumi lambili zamadola asemelika.

Kolunye udaba olufanayo iqembu le FC Platinum balibhaxabule nge 5 ka 1 liqembu le Young Africans ele Tanzania kuhlandla lakuqala elesigaba sakuqala esomncintiswano we Caf Confederations Cup.

Lawamaqembu abedlalela khonale eTanzania njalo azadibana futhi kumaviki amabili lapha kweleZimbabwe okuzamele ukuba iPlatinum ihlohle kane kungela mpendulo ukuze idlulele kusigaba esilandelayo esomncintiswano.

***********************

Emidlalweni yenguqu edlalwe kwamanye amazwe ngempelaviki edluleyo.

NgaseNgilandi iqembu le Chelsea selikhokhela ngemiklomelo emihlanu phezu kwengalane ngemva kokwenelisa kwalo ukuthola umklomelo owodwa lapho lisiba angutshiki lobhanqa lele Southampton kwathi lelo elihlezi kundawo yesibili ele Manchester City ladliwa ngele Burnley nge 1 ka nya.

IChelsea ilemiklomelo engamatshumi ayisithupha lane kuthi ele City lilemiklomelo engamatshumi amahlanu lathoba minwe mbili.

Kundawo yesithathu kuleqembu le Arsenal elilemiklomelo engamatshumi amahlanu lesikhombisa ikanti iqembu le Manchester United likundawo yesine lilemiklomelo engamatshumi amahlanu lesithupha.

Elizweni le Spain iqembu le Barcelona lalele phezu kwengalane lilemiklomelo engamatshumi ayisithupha lanhlanu ngemva kokunqoba kwalo ele Elbar nge 2 ka nya kuthi ele Real Madrid likundawo yesibili lilemiklomelo engamatshumi ayisithupha lane.

Iqembu le Valencia yilo elihlezi kundawo yesithathu lilemiklomelo engamatshumi amahlanu lesikhombisa kuthi ele Atletico Madrid likundawo yesine lilemiklomelo engamatshumi amahlanu lesithupha.

****************************

Iqembu le Zimbabwe liqede imidlalo yalo kumncintiswano wezizwe zomhlaba linqobe kanye kuphela ngemva kokutshaywa lasemdlalweni walo wokucina ngele India lapho elinqotshwe khona ngama wickets ayisithupha.

Phezu kwalokho leliqembu selilahlekelwe ngumdlali odlale kuhle kakhulu kulumncintiswano uBrendan Taylor yena osekhethe ukuyadlala elizweni leNgilandi edlalela iqembu le Nottingshire.

Loba kunjalo omunye umdlali owayesewama ukudlalela iqembu lelizwe uGraeme Cremer ubikwa ephakathi kwenkulumo lenhlanganiso yeZimbabwe Cricket ezokuba ephenduke.

Eminye njalo imibiko ithi umqeqetshi uDav Whatmore laye uphakathi kwenkulumo le Zimbabwe Cricket ezokuba aqhubekele phambili eqeqetsha iqembu lelizwe njengoba wayeqhatshwe ukuba akhokhele leliqembu kumidlalo yezizwe zomhlaba kuphela.

XS
SM
MD
LG