Uhlelo lweBosso oluqale ngoMvulo ngolokuqogelela imali ezaphathisa ukuvuselela isibhedlela seEkusileni ebesesihlale okweminyaka eminengi sivaliwe, ukuze siqale ukusebenza ngemva kokubonakala ukuba yiso esingaphathisa abaphethwe ngumkhuhlane we Covid 19.
Isikhulumeli seqembu le Highlanders uRonald Moyo uthi bakubone kufanele ukuba bacele abalandeli beqembu kanye labasebenzisana labo ukuba baphatheke ekudingeleni isibhedlela se Ekusileni usizo.
“Thina njengeqembu sibona ukuthi impilo iqakathekile kakhulu yikho sifuna ukuba abalandeli bethu abayizigidi lezigidi bathole usizo ngoba kulumhlubulo welizwe bekungela sibhedlela esiphathisa abahlaselwe ngumkhuhlane lo. Nxa singabambana njengendlela esibambana ngayo nxa sikholisa umdlalo webhola singenelisa ukulwisana lawo umkhuhlane we Covid 19.”
UMoyo uthe abafuna ukuphathisa bengafaka imali besebenzisa i merchant code ye One Money ethi 40533 kumbe besebenzise iBiller Code eye Ecocash ethi yona 70662.
Umkhuhlane we Covid 19 usuhlasele abantu abafika phose izigidi ezimbili umhlaba wonke jikelele njalo kwele Zimbabwe sekulabantu abathathu asebedlule emhlabeni ngenxa yawo.
Isibhedlela se Ekusileni Medical Centre siqedwe ukwakhiwa ngomnyaka ka 2004 kodwa kasizange sibe sisasebenza ngoba kwasuka kwathengwa imitshina engasebenziyo njalo imizamo eyokusivula eminyakeni eyedluleyo ibiphelela emoyeni njengezithukuthuku zenja.
Kuthe ngemva kokutholakala ukuba ko Bulawayo akula sibhedlela esilungele ukwelapha abangabe bebanjwe ngumkhuhlane we Covid 19 kwaqala inhlelo ezokusivula lesisibhedlela ezikhokhelwa yinhlanganiso ezibiza ngokuthi I am 4 Bulawayo yona egoqela abaphuma kungatsha ezitshiyeneyo.