Iqembu lenguqu eleHighlanders liphakamise inkezo ye ZNA Charities ngemva kokunqoba ele Harare City ngeSonto kodwa isithathelwe isikhundla sokukhokhela engalaneni yemiklomelo kuPSL yi FC Platinum.
Abafana be Highlanders banqobe abe Harare City nge 4 ka 2 ngemva kokutshaywa kwembekwa njengoba lumdlalo ubufike kumizuzu engamatshumi ayithoba munwe munye kungela qembu elenelise ukulitshayela emambuleni.
Lokhu ngokwesibili iminyaka ilandelana ukuba iqembu le Highlanders liphakamise inkezo ye ZNA Charities njengoba nyakenye linqobe ele Dynamos ku final.
Iqembu le Highlanders lithole inkulungwane ezilitshumi lambili zamadola aseMelika okuyimali ezaliphathisa njengoba libhekane lodubo lwemali.
Phambilini komdlalo we ZNA Charities kube lomhlangano lapho amalunga eqembu le Highlanders, ama life members, avumelane ukuba umuntu ngamunye akhokhe amadola angamatshumi amabili ngenyanga.
Limali ngeyokuzama ukuphathisa iqembu leHighlanders lona elibikwa lilesikwelede esesifika phose kusigidi samadola.
************
Kolunye udaba olumayelana lomdlalo wenguqu iqembu le FC Platinum yilo eselihlezi phezu kwengalane yemiklomelo kusigaba se Castle Premier Soccer League ngemva kokunqoba iqembu le Chicken Inn nge 1 ka nya ngoMgqibelo.
Limpumela idale ukuba abafana be FC Platinum bekhuphule inani lemiklomelo abalayo liye kumatshumi amathathu lantathu ngemva kwemidlalo elitshumi lanhlanu.
Inkokheli zeqembu le Chicken Inn zisele zisidla amalangabi ngokuthukuthela ekupheleni komdlalo zizondele unompembe uThomas Masaa yena ezimethesa umlandu wokwenza izinqumo ebezisekela iqembu le FC Platinum.
Iqembu le Highlanders lona ebelihlezi phezulu phambilini kwalumdlalo wangoMgqibelo lilakho ukuhwitha ele FC Platinum liyehlala njalo esiqongweni njengoba lizadlala lele Triangle ngoLwesithathu enkundleni ye Barbourfields.
Abafana be Bosso balemiklomelo engamatshumi amathathu ngemva kokudlala imidlalo elitshumi lane.
Komunye umdlalo ozadlalwa ngolwesithathu edolobheni lako Bulawayo iqembu le Tsholotsho lizemukela ele Mutare City enkundleni ye White City.
********
Sikhangele umdlalo weRugby:-
Iqembu elimela ilizwe le Zimbabwe emdlalweni werugby aliselalo ithuba lokuyaphatheka kumidlalo yezizwe zomhlaba ezaqhutshelwa kwele Japan ngo 2019 ngemva kokuba linqotshwe nge 34 ka 27 liqembu le Uganda ngoMgqibelo emdlalweni we Africa Cup.
Limpumela itsho ukuba iqembu le Zimbabwe aliselakho ukwala lilokhu lidlala kusigaba sika Group 1A njengoba lo bekungumdlalo wesibili lilokhu linqotshwa ngemva kokuba litshaywe ngele Kenya kumaviki amabili edluleyo.
Iqembu eliphakamisa inkezo ye Africa Cup kuzinga lika Group 1A yilo eliba lelungelo lokuyadlala emncintiswaneni wezizwe zomhlaba okulithuba iqembu le Zimbabwe elingaselalo njengoba selisiyadlala ku Group B.
