amalinks wokungena

Breaking News

Ikhansili YakoBulawayo Ilandula Imbiko Yokuthathelwa Impahla Ngenxa Yesikwelede


Iziphathamandla zedolobho lakoBulawayo zithi akusoze kwenzakala ukuthi zithathelwe iCity Hall le Tower Block libhanga le Kingdom Bank njengalokho okucatshangelwa nguzulu ngenxa yesikwelede sebhanga leli sezigidi ezinhlanu zamadollar eMelika - $5 million.

Umnu. Patrick Thaba Moyo umayor wedolobho leli utshele iStudio 7 ngoLwesine ukuthi ikhansili isibhadele imali etha xaxa yesikhwelede lesi ukwenzela ukuthi ingephuli isivumelwano eyasenza isithatha.

UMoyo uthe kungamanga ukuthi ikhansili ibambise iCity Hall le Tower Block ithatha isikwelede lesi nyakenye eyasisebenzisa ukuthenga imota zokuthwala ingcekeza lezokucitsha umlilo, ama ambulances kanye lemota zeziphathamandla zekhansili.

Uqhubeke ethi imota zokuthwala ingcekeza sezilethe inguquko emangalisayo kwezinye indawo zedolobho leli.

Iziphathamandla zebhanga le Kingdom Bbank ziyalile ukukhuluma ngaloludaba.

Umnu. Roderick Fayayo umqondisi we Bulawayo Progressive Residents Association uthi ingcekeza lokhe igcwele ezitaladini zakoBulawayo loba nje ikhansili yathenga imota zokuyithwala ngesikwelede se Kingdom Bank.

XS
SM
MD
LG