Ikhansili yeChitungwiza isimise uhlelo lwayo lokudiliza izindlu ezibikwa zakhiwe ngaphandle komthetho kulandela ukungenela kwenhlanganiso elwela amalungelo oluntu, iZimbabwe Lawyers for Human Rights.
Kumbiko ewethule izolo inhlanganiso le iveze ukuthi ibhalele ikhansili le iyixwayisa ukuthi ekwenzayo akukho emthethweni ngoba ayilamvumo yomthethwandaba.
Ngokunjalo, iZimbabwe Lawyers for Human Rights ithi ithole impendulo ikhansili iyazisa ukuthi isilumisile loluhlelo.
Inhlanganiso emela izakhamizi eyeChitungwiza Residents Trust yiyo ecele usizo lwamagqwetha la ngemva kokuba izakhamizi ezinengi zidilizelwe izindlu zasala zingaselandawo zokuhlala.
Lokhu kucunule abantu abanengi. Kodwa umasipala uthi izindlu lezi zakhiwe lapho okungavunyelwa khona.
Umeli weSoutherton edale lephalamende uMnu Peter Moyo utshele iStudio 7 ukuthi ikhansili iyaphambanisa ngoba yiyo eyathengisela abantu indawo zokwakhela lezizindlu.
Kasenelisanga ukukhuluma leziphathamandla zekhansini yeChitungwiza.