amalinks wokungena

Breaking News

Ele Zimbabwe Libikwa Lingela Mali Yokukhuphula Iholo Lezisebenzi


Ingcwethi zenotho lezombusazwe zithi uhulumende we Zimbabwe kenelisi ukukhuphula iholo lezisebenzi loba izisebenzi zisithi zizakhalala umsebenzi ngeviki ezayo nxa linga ngezelelwanga.

Umphathintambo wezemali uMnu. Tendai Biti kazange vele afake imali yokukhuphula iholo lezisebenzi ku budget yelizwe lonyaka.

Ngakho-ke zithi uhulumende engenelisa kuphela ukukhuphula iholo nxa engathola imali yokwemba amadayimana eMarange esigabeni se Manicaland lobanje kungabonakali ukuthi laleyo mali ezuzakalayo isetshenziswa njani.

Ziphinde zathi kuyenzakala ukuthi uhulumende asebenzise imali yenhlelo ezinjenga lezo ezikhangelane lempilakahle kazulu kanye lezemfundo ukwenzela ukubhadala izisebenzi iholo elikhuphukileyo.

Izisebenzi zikahulumende zikhangelelwe ukuthi zikhalale umsebenzi ngoLwesine ozayo.

Zifuna ukuthi isisebenzi esihola imali ephansi siphiwe amakhulu edlula amahlanu amadola ngenyanga-$540.

Okwamanje zithola amakhulu edlula kancane amabili-$253. Ababalisi abakunhlanganiso ye Progressive Teachers Union of Zimbabwe okwamanje bakhalale umsebenzi loba nje besiya esikolo nsukuzonke.

Ingcwethi kwezenotho uMnu. Rejoice Ngwenya uthi kumele uhulumende aphathe udaba lweholo lwezisebenzi ngonanzelelo.

Kusenjalo, inhlanganiso zababalisi iProgressive Teachers Union of Zimbabwe le Zimbabwe Teachers Association sezithwalelane ubhulo ngenxa yendlela iApex Council eqhuba ngayo inkulumo lohulumende ngeholo lezisebenzi.

Umnu. Takavafira Zhou ongumqondisi we PTUZ uthi iApex Council isilahlekile njengoba isidlelana lohulumende hatshi izisebenzi ezifuna iholo elikhuphukileyo.

Umnu. Zhou uthi iApex Council isingcolile njalo lombiko wayo wokuthi izisebenzi kumele zikhalale umsebenzi okwelanga elilodwa ngeviki ezayo kudidanisa ingqondo.

Kodwa-ke uMnu. Sifiso Ndlovu umqondisi we ZIMTA uthi okukhulunywa yi PTUZ kuyamangalisa.

XS
SM
MD
LG