Uhulumende womanyano usezabambisana indlela labosomabhizimusi ukuthi kudingwe izigidi ezilikhulu lamatshumi amabili amadola eMelika kwele Botswana le South Africa eyokuthuthukisa inotho yelizwe.
Lokhu kukhangelelwe ukuthi kwenzakale ngesiphangi phangi njengoba amafekithali amanengi esevala ngenxa yokuswelakala kwemali yokulungisa impahla yokuthengisa.
Umnu. Trust Chikohora umqondisi wenhlanganiso ye Zimbabwe National Chamber of Commerce uthi nxa imali le ingatholakala lokhu kuzanceda osomabhizimusi ababhekane lohlupho lokuswelakala kwemali yokuthuthukisa amankampani abo.
Amazwe la athembisa ukupha ele Zimbabwe imali yokulungisa inotho yalo kusanda kubunjwa uhulumende womanyano.
Umnu. Japhet Moyo, umsekeli kanobhala jikelele we Zimbabwe Congress of Trade Unions, utshele uGibbs Dube we Studio 7 ukuthi osomabhizimusi kumele bakhokhele loluhambo.
