Amagqwetha amela ilunga lebandla le Movement for Democratic Change (MDC-T), uMnu. Barnabas Mwanaka, owetheswa icala lokubulala ipholisa, ulandula lelicala esithi uMwanaka wayengekho eHarare ngesikhathi kusenzakala ubudlwangudlwangu kwabulawa uSergeant Talkmore Phiri.
UMwanaka ubesemthethwandaba ngoMvulo esetheswa icala lokubulala lamanye amabili awokutshaya amapholisa mhlaka 29 ngoNhlangula eHarare lapho okwaqhamuka khona udlakela abaphila ngokuthengisa bekhonona ngokuphoswa kwameva ensimbi awokwenqabela izimota ukuthi zingabalekeli amapholisa (amaspikes).
Umthethwandaba uyavuma ukuba uSergeant Phiri wawa emoteni kodwa amapholisa athi uthe ewile uMwanaka labanye abasekeli bebandla leMDC bamgongoda ngamatshe.
Elinye lamagqwetha kaMwanaka, uMnu. Tonderai Batasara, uthi uMwanaka wayengekho eHarare mhlaka 29 ngonHlangula ngoba wayesedolobheni leKadoma.
Amapholisa athi alobufakazi bokuthi uMwanaka ngomunye owabonakala kumfanekiso kamabonakude etshaya ipholisa kodwa uBatasara uthi amapholisa ayala ukubapha lobubufakazi.
Umsakazo weVOA Studio 7 uxoxe lomsekeli wesikhulumeli seMDC-T, uNkosazana Thabitha Khumalo, othe, "Udaba lokuthi omunye webandla lethu ubelele ipholisa luyasidida ingqondo ngoba yena lowo muntu wayevele engekekho eHarare.”
