amalinks wokungena

'Imali Eyabelwe Ezempilakahle kuBudget ka2017 Ayeneli'

  • Nothando Sibanda

UMnu. Patrick Chinamasa

Abacubungula ezenotho lezempilakahle bathi imali eyabelwe ugatsha lwezempilakahle ayingeke yaluguqula uhlangothi lolu okutsho ukuthi ngomnyaka ozayo izibhedlela zizaqhubeka ziyizakhiwo nje abantu beswela ukuthola uiszo lokelatshwa.

Abezenhlalakahle kazulu bathi kuyadabisa ukubona ukuthi nxa kukhangelwa ukwabiwa kwemali ku-budget, kukhanya inengi lemali liphelela kuholo lezisebenzi kungela eyokuthuthukisa izibhedlela, ukuthenga imithi kanye lemitshina etshiyeneyo lokwehlisa indleko zokwelatshwa.

Phakathi kwamabillion amane amadola, amathathu ayaphelela kuholo lezisebenzi. Kulimali, ugatsha lwezempilakahle luthole phose izigidi ezingamakhulu amathathu - $280 million. Imali enengi inikwe ingatsha zemfundo, ukuvikela ilizwe lezokulima.

UMnumzana Khumbulani Maphosa, osebenza kwezamalungelo oluntu, uthi ibudget yalonyaka iveza ukuthi uhulumende kaqakathekisi ilungelo lempilakahle kazulu ikakhulu nxa kukhangelwa umumo wezibhedlela zakuleli esezitshiye abalemali besiyadinga ukwelatshwa phandle kwelizwe kuthi abangela zikhwama ezikhudumalayo bafe langemikhuhlane ebingelapheka.

IZIBHEDLELA SEZIBHIDLIKILE

UMnumzana Japhet Dlamini, isakhamuzi sakoBulawayo, uthi kuyakhathaza ukwabiwa kwemali lokhu okungaqakathekisi impilakahle ngoba izibhedlela zivele sezaba yizakhiwo nje ezingelancedo.

Okudanisayo yikuthi ugatsha lolu luthole imali ephansi kulenikwe ugatsha lwezomvikela ngesikhathi ilizwe lihlalisene labomakhelwane kungela mpi. Sikhuluma kunje izibhedlela ezinkulu ezifana laboMpilo, Ingutsheni leHarare central bezisehluleka ukusebenza lonyaka ngoba kungela mali eziyitholayo.

Esinye njalo isakhamuzi, uNkosikazi Emma Ngulube, uthi okwenziwa nguhulumende kulihlazo njalo akuzwisiseki ukuthi kungani ephatha abantu bakhe ngochuku ngoba umumo osezibhedlela uzwisa ubuhlungu.

Uthi abantu batshelwa ukuthi bazidingele imithi okuyisimanga ukuthi bona bayithola ngaphi nxa yena uhulumende esehluleka.

UNkosikazi Ngulube uqhubeke elandisa ngakubona esibhedlela sikahulumende lapho athi izigulane zazihlezi zingathintwa odokotela bemelele ukuthi zithole imali yokubhadala imitshina yokuzihlola ngoba eyezibhedlela lezi ingasebenzi.

UZULU UYAZIBONELA EZIBHEDLELA

Uthi kuyadingeka ukuthi uhulumende angenele kuloludaba izibhedlela zithole imali eyaneleyo ngoba izizalwane ezingelamali ziyikhotha yomile imbenge.

Esethula ibudget yomnyaka ozayo, umphathintambo wezemali, uMnumzana Patrick Chinamasa, uphe imali engaphezu kwekhulu lesigidi - $108 million, kuhlangothi olukhangela ukuhlaliseka kwabantu iSocial Welfare lezigidi amakhulu amabili kugatsha olukhangela ubudlelwano kuleli iHome Affairs.

UMnumzana Chinamasa ulethe njalo umthelo omutsha lapho isilinganiso sokuhlanu ekhulwini-5% yemali yokutshaya ucingo kubomakhalekhukhwini ezakuya esikhwameni esitsha sezempilakahle, iHealth Fund.

XS
SM
MD
LG