Icele leMDC elikhokhelwa nguMnu Welshman Ncube lazise ngoMvulo ukuba alisoze lincintise kukhetho lokudinga umlawuli wedale lephalamende olukhangelelwe ukwenziwa ngoLwesibili lathi njalo amalunga alo kasoze avote kulolukhetho.
Lokhu kutsho ukuba iZanu PF leMDC ekhokhelwa nguMnu Morgan Tsvangirai yizo ezizancintisana.
Ibandla leli lithethe isinqumo sokungaphatheki kulolukhetho emhlanganweni elizwenze ngeSonto lisithi alisoze lithathe uhlangothi ngoba amabandla womabili, athi iZanu PF leMDC kaTsvangirai ezimbila zantabanye.
Amalunga alelibandla athile esikhulume lawo athe ebengakaziswa yinkokheli yawo ngaleli nyathelo.Amanye awo athe azavotela obengumlamuli njalo engowe MDC kaTsvangirai uMnu Lovemore Moyo.
UMoyo ususwe kulesisikhundla ngumthethwandaba weSupreme Court kunsukwana ezisanda kwedlula ngemva kokunquma ukuthi kakhethwanga ngemfanelo.
Ukudingisisa esikwenzileyo kuveze ukuba ukhetho lwangoLwesibili lulakho ukudluliselwa phambili ngoba iZanu PF isithi ayikaziswa ngokuthi akusela mlawuli wedale.
Isikhulumeli seMDC kaNcube uMnu Nhlanhla Dube utshele iStudio 7 ukuthi uTsvangirai loMugabe kuyafana nje, yikho bengasoze bathathe uhlangothi phakathi kwababili laba.
Umkhokheli weZanu PF edale lephalamende uMnu Joram Gumbo uthe ibandla lakhe khona lizahlala phansi likhethe ozalimela kukhetho lukamlawuli, okutsho ukuba kalisoze livume ukuthi ukhetho lolu lwenziwe ngoLwesibili.
