Umphathintambo obona ngokwenzakala ehofisini yenhloko kahulumende, uMnu Jameson Timba uhlangane labameli bamanye amazwe eZimbabwe ngoLwesihlanu ebazisa ngempumela yomhlangano weSadc oqhutshelwe eSouth Africa ngempelaviki edluleyo.
UTimba wazise njalo abakwamanye amazwe laba ngokwenzakala elizweni kwezombusazwe okugoqela udaba lokuhlukuluzwa lokubotshwa kwamalunga ebandla lakhe leMDC ekhokhelwa nguMnu Morgan Tsvangirai kanye lodlakela.
Kunjalonje, amalunga ogatsha lweJomic alubhekise eChimanimani ngoLwesihlanu ukuyacwayisisa ngembiko yodlakela kulandela ukutshiswa kwemizi ethile kuleyo ndawo ngenyanga edluleyo.
Omunye wamalunga eJomic uNkosazana Thabitha Khumalo utshele uNtungamili Nkomo weStudio 7 ukuthi ugatsha lwakhe lukhathazeke kakhulu ngembiko yodlakela le.
