amalinks wokungena

Breaking News

Lokhe Etheleka Amazwi Endunduzo Ngemfa Yomculi uDavid Masondo


AmaSoul Brothers

Aqhubekela phambili esiza evela endaweni zonke zomhlaba amazwi enduduzo kulandela imfa yomculi womdumo weMbaqanga odumileyo uDavid Masondo. UMasondo, ongomunye wabasungula iqembu le Soul Brothers ngo 1974 ubhubhele esibhedlela se Garden City eJohannesburg ngeNsonto. Inengi selichaze umuyi njengeqhawe kwezomculo.

Imfa kaDavid Masondo isitshiye abathanda umdumo weMbaqanga bedangele. UDavid obenguye okhalelayo eqenjini lamaSoul Brothers, ubhubhe ngemva kokuvalelwa esibhedlela kulandela ukuzizwa esedinwe kakhulu ngemva kokuculela abalandeli bakhe eNelson Mandela Bay kweleSouth Africa ngenyanga ephelileyo. Inengi selichaze imfa yakhe njengokulahlekelwa okukhulu.

UMoses Ngwenya, okunguye yedwa osesele kubaculi abasungula iSoul Brothers, uthi uDavid uzahlala ekhunjulwa kantike uyathembisa ukuthi iSoul Brothers kayisoke ife.

Isiphathamandla seqembu le Soul Brothers uBhodloza Nzimande uchaze umuyi njengomculi ongomunye wabebelethalenta elincomekayo kakhulu.

Imbongi yakweleSouth Africa edume kakhulu uMzwakhe Mbuli uthi umuyi ubeyinkosi kwezomculo.

Phansi kobukhokheli bukaDavid, iSoul Brothers ibile ngoma ezipholileyo zithinta inhliziyo njengale ethi Wambiza umbiza.

Umculi weZimbabwe odumileyo ohlabela umdumo kaMaskandi uZinjaziyamluma uthi umdumo wembaqanga kawusoke uphinde usafana uDavid engasekho. UMlungisi Tshabalala ngomunye wezizalwane zeZimbabwe ezithanda umdumo wembaqanga ezethulela uDavid ingwane ngokutshiya isibonelo esihle lakubaculi beZimbabwe.

Lobanje uDavid leSoul Brothers bezahlala bekhunjulwa ngabanengi emhlabeni jikelele, amaqhathanzipho lentokazi ezinyathela kuzwakale bona bazamkhumbula kakhulu ngeculo lakhe leli elithi Wamuhle mtwanomuntu.

XS
SM
MD
LG