Sezingutshiki lobhanqa phakathi kweqembu le Zimbabwe lele New Zealand emidlalweni kakhilikithi eyohlobo lwe One Day International eqhutshelwa esigodlweni iHarare kulezinsuku.
Iqembu le New Zealand linqobe ele Zimbabwe ngama wickets alitshumi ngoLwesibili enkundleni ye Harare Sports Club okutsho ukuba lawa maqembu asengutshiki lobhanqa 1 ka 1 njengoba iqembu le Zimbabwe linqobe kumdlalo wakuqala ngama wickets ayisikhombisa ngeSonto.
Abafana be Zimbabwe yibo abaqale ukutshaya ibhola emdlalweni wangoLwesibili benelisa ukubuthelela ama runs angamakhulu amabili lamatshumi amathathu lanhlanu (235) belahlekelwe ngabadlali abayithoba munwe munye phakathi kwama overs angamatshumi amahlanu.
Ama runs alikhulu kulelinani elibuthelelwe liqembu le Zimbabwe avele kumdlali uSikandar Raza njalo lokhu kuza ngemva kokuba ngeSonto umdlali uCraig Ervine laye etshaye ama runs alikhulu lamatshumi amathathu okuyinto epha abalandeli baleliqembu ithemba lokuba leliqembu selisenelisa ukuncintisana lamanye amaqembu hatshi ukuba ngumthatshuzwa.
Iqembu le New Zealand lithe seliphendula labuthelela ama runs angamakhulu amabili lamatshumi amathathu lesithupha (236) lingalahlekelwanga yiloba oyedwa umdlali njalo lokhu likwenze phakathi kwama overs angamatshumi amane lambili.
Lawa maqembu azadibana njalo ngoLwesihlanu mhla ziyisikhombisa emdlalweni wesithathu owohlobo lwe One Day International.
Impumela yomdlalo lo owesithathu yiyo ezaveza ukuba yiliphi iqembu elinqobe elinye kumidlalo ye ODI njengoba lumdlalo ungowokucina kwemithathu eyohlobo lolu.
NgeSonto lawamaqembu azadibana kumdlalo owohlobo lwe Twenty20 njalo ongowokucina phakathi kwalawa maqembu khona njalo enkundleni ye Harare Sports Club.