Iqembu le Chicken Inn lalele phezu kwengalane yemiklomelo kusigaba se Castle Premier Soccer League lilemiklomelo engamatshumi amathathu ngemva kokuba ngutshiki lobhanqa leqembu le Caps United kungela qembu elenelise ukulitshayela emambuleni.
Kundawo yesibili kuhlezi iqembu le Triangle lona elibe ngutshiki lobhanqa 0-0 lele Highlanders njalo lilemiklomelo engamatshumi amabili lethoba munwe munye okulinani elilingana lalelo elileqembu le How Mine elihlezi kundawo yesithathu.
Iqembu le How Mine linqobe ele Buffaloes nge 1 ka nya lahle leqa layahlala phezu kweqembu le Dynamos lona elihlezi kundawo yesine lilemiklomelo engamatshumi amabili lethoba minwe mbili.
Kundawo yesihlanu kuleqembu le FC Platinum elinqobe ele Chapungu nge 2 ka nya lona elilemiklomelo engamatshumi amabili lanhlanu njalo lilingene ngemiklomelo leqembu elikundawo yesithupha ele Caps United.
Iqembu le Harare City lihlezi kundawo yesikhombisa lilemiklomelo engamatshumi amabili lantathu njalo lilingene ngemiklomelo leqembu le Chapungu elikundawo yethoba minwe mbili.
Kundawo yethoba munwe munye kuleqembu le Highlanders elilemiklomelo engamatshumi amabili lanye kuthi ngemva kwalo kulamaqembu amathathu athi ele ZPC Kariba, ele Hwange kanye lele Buffaloes wona alemiklomelo elitshumi lesithupha.
Iqembu le Tsholotsho lihlezi kundawo yetshumi lantathu lilemiklomelo elitshumi lanhlanu lona lilandelwa ngamaqembu athi ele Flame Lily kanye lele Whawha wona alemiklomelo elitshumi lantathu.
Emsileni wengalane kutholakala iqembu le Dongo Sawmills lona elilemiklomelo elitshumi lanye.
...........................................
Sikhangele umdlalo kakhilikithi;
Iqembu elimela ilizwe emdlalweni kakhilikithi lidliwe kumidlalo emibili eyohlobo lwe One Day International ngele India okutsho ukuba ele India yilo eselinqobe kumidlalo yaloluhlobo ngoba sekusele umdlalo owodwa ozadlalwa kusasa.
Emdlalweni wakuqala obekhona ngoLwesihlanu olwedluleyo iqembu le India linqobe ngama runs amane kuthi emdlalweni wesibili odlalwe ngeSonto iqembu le India linqobe ngama runs angamatshumi ayisithupha lambili.
Ngemva kwemidlalo eyohlobo lwe One Day International lawamaqembu azadibana kumidlalo emibili eyohlobo lwe Twenty20 yona ekhona ngoLwesihlanu langeSonto.