Lanxa inengi laba beZimbabwe besithi bangamakholwa esiKristu, kukhanya besesekhona abakholwa ekusebenziseni imithi ethile nxa kukhangelwa izitolo ezisedolobheni lakoBulawayo ezithengisa imithi yokuletha imali, yokuletha abesilisa kumbe abesifazana kanye lokuthi lowo olaye abheke wena wedwa. Kambe nga iyasebenza yini limithi?
Kwakuvamile ilizwe lisadla ngoludala ukuthi uzwe kuthiwa uKhumalo ugcoba amafutha esilwane akangeneki, kumbe uNcube nguphunyuka bemphethe akabambeki kodwa inengi belicabanga ukuthi lokhu ngokwayizolo sokwadlulwa yisikhathi.
Kungakho ke inengi alazi ukuthi zisesekhona izitolo ezinkini yedolobho lako Bulawayo ezithengisa imicimbicimbi yamafutha ekhanya ijonge ukuletha inhlanhla lothando empilweni yomuntu.
Nxa ungena kwesinye salezizitolo uhle ukhangwe zimbodlela ezilamafutha imibalabala etshiyeneyo, uthi usabambe owangaphansi uthi mehlo suka ukhangwe ngamabizo emithi le. Laphana ngumlomo mnandi, laphana ngubheka mina ngedwa kuthi bucwadlana nje yisiwatsho samaphupho.
UNkosikazi Busi Matobo, oyisakhamuzi, uthi yena ubengazi ukuthi impahla enje isisekhona kunsuku zalamhla abantu sebefundile baphucuka. Ukuthengiswa kwempahla le, uthi kutshengisa ukuthi kulabosomabhizimisi abagangileyo abathembisa abantu uzulu emhlabeni ngoba limithi yiuyengana nje ayisebenzi.
UMnumzana Saziso Mathe, ongumfundisi, uthi abantu abasebenzisa limpahla ngabavele bekholwa kukholo lwesintu kumbe beke baphatheka kokunye kobunyanga okuyabe kudingwa ukulungiswa okuyikho okungenza umuntu ayethenga amafutha abotikolotshe kumbe isawudo lokuxotsha imimoya ethile. Uthi bona kukholo lwesiKristu bakhuthaza abantu abalenhlupho zemimoya ebalandelayo ukuthi beze bathole usindiso ngoba limithi ayisizi okuyangaphi. Uthi yena kuyafana nje lamafutha asethengiswa emasontweni ngoba uNkulunkulu usilisa ngelizwi lakhe hatshi ulutho olubambekayo angani yinyanga.
Esinye njalo isakhamuzi, uNkosikazi Nomagugu Nkomo uthi impilo yalamhla inzima okuyikho osokwenza abantu baphathaphathe yonke into bethi akwaziwa okwanonisa ingulube. Ekadeni uthi imithi le yayivame ukusebenza kodwa lamhla abantu sebelolwazi olutsha okokuthi akumelanga bathembe izihlahla. Wengeze esithi abantu bangabe becabanga ukuthi lawamafutha ehlukile kumpande lezihlahla ezazinikwa kumbe kuthiwe umuntu akhulume efake ulutho oluthile ngaphansi kolimi, kulokhu kufana nje yikuthi abathengisayo sebahlakanipha usuthenga ezitolo awusayi ensitha lapho ozakhutshiswa izicathulo, uhlaliswe ecansini.
Umnumzana Jericho Fuyane yena ukholwa kwezamasiko. Uthi ye imithi le iyasebenza kodwa isetshenziswa yizigangi ezifuna ukwenza ulutho phezu kwentando yomuntu. Omlomo mnandi, owoza kimi labo bheka mina ngedwa, ikakhulu, uthi basetshenzisa ngabesilisa labesifazana abafuna abantu babathande lalapho bengafuni athi akulunganga kodwa ye kuyasebenza.
Khona ekadeni kwakusebenza imicimbicimbi yamafutha – awesilwane ayesenza abantu bamhloniphe owagcobileyo, awemvu okuthiwa ayesenza umntwana angakhulelwa zinkanda zabanye kanye lawenhlathu ayesenza umuntu angajwayeleki. Akwaziwa ke ukuthi labo ababesaziwa ukuthi zinkonjwa babegcoba yini bona omlomo mnandi kumbe babephiwe nje ekukhulumeni.
Lanxa lamhla kungasavamanga amafutha ezilwane, kukhanya sokuvama amafutha la lemabandleni aphiwayo ukwelapha, ukuletha inhlahla kanye lokuxotsha amadimoni okungaziwayo ukuthi wona ehluke ngaphi lawonala okubiza imali labo bheka mina ngedwa.