Kuhlandla eliphathelane lombuso wabensundu sikhangela indima eyadlalwa yizakhamizi zemaphandleni kumzabalazo wokulwisana lombuso woncindezelo.
Abanengi bayavumelana ekuthini ngabe uzulu wemaphandleni wayengekho, kwakungasoze kube lula kwababephethe imbhobho besilwa empini nanku ukudla lokunye okutshiyeneyo okufana lezigqoko babekuthola kuzulu.
Kwakungelula ngoba esikhathini esinengi abemaphandleni laba babezithola sebephakathi kwelitshe lembokodo, njengokutsho kukaMnu James Sibanda, yena owayesemaphandleni eGwanda ngaleso sikhathi.
UMnu Sibanda wathathwa ngabeviyo leZipra esikolo seManama esenza izifundo zikaForm 2 labanye abafana bahanjiswa eBotswana ukuyalolonga.
Uthi uyadana kakhulu ngoba akuhambela empini akakuboni kanti njalo uzulu wemaphandleni laye kananzwa nguhulumende.
Amazwi kaSibanda agcizelelwe nguMnu Morris Mathobela oweBinga laye owachapha ukuyalolonga eZambia lapho akhumbula khona bebhonjwa ngamasotsha kaSmith besenkambeni ababelolongela kuzo.
Imbongi yeNtalale eGwanda uMnu Nqindi Lerato Ndlovu laye ukhala ngemisebenzi.
Inengi lithi zingamaqhawe izakhamizi zemaphandleni lanxa zingayanga empini ngoba zaziphathisa abalweli benkululeko ngendlela ezitshiyeneyo.
Ngalokho, abanengi bathi uhulumende kumele aqakathekise inhlalakahle kazulu wemaphandleni izakhamizi zitholiswe zonke indingeko zempilo eziqamqoka.