Ingxabangxoza ekubandla leMDC-T iqhubekela phambili ngemva kokungenela kwemhuli kaMnu. Morgan Tsvangirai esisetheswa icala lokusekela uhlangothi.
Abasakeli baka Tsvangirai ababalisa oMnumzana Nelson Chamisa loElias Mudzuri kanye loNkosazana Thokozani Khuphe bonke bathi yibo abaphethe isikhundla somkhokheli walelibandla yena oyelatshwa esibhedlela e South Africa.
Umsakazo we SABC ukhulume labantwana, umalukazana kunye lomnewabo ka Tsvangirai abathi akulamuntu oseke wakhuluma loTsvangirai ngaphandle kukaMnu. Mudzuri.
Abanengi bathi lokhu kutshengisa ukuthi imuli ka Tsvangirai isekela uhlangothi luka Mdzuri.
Yena uMudzuri ngoLwesine wethule umbiko kutwitter egcizelela ukuthi nguye okufanele aphathe isikhundla somkhokheli.
Kodwa uMnu. Chamisal laye wethule owakhe umbiko ngobulembu obufanayo esithi useqalisile umsebenzi kulandela umbiko owethulwa yisikhulumeli sikaMnu. Tsvangirai uMnu. Luke Tamborinyoka ngoLwesithathu langoLwesine, okhomba ukuthi nguye okufanele abephethe lesi isikhundla.
Isikhulumeli seMDC-T uMnu. Obert Gutu usanda ukugcizelela ukuthi imbiko eqotho eyalelibandla yethulwa nguye ngakho abantu bengalaleli okutshiwo nguMnu. Tamborinyoka.
Kodwa uMnu. Tamborinyoka ugcizelele emhlanganweni lentathelizindaba ukuthi yena wethula imbiko evela kuMnu. Tsvangirai njengoba nguye isikhulumeli sikaTsvangirai.
Ngakwelinye icele, uNkosazana Thokozani Khuphe, laye usanda kwethula umbiko ku twitter esithi nguye okufanele aphathe isikhundla sikaMnu. Tsvangirai ngoba wakhethwa kumhlangano wecongress njengomsekeli kamongameli, kukanti oMnu. Chamisa loMudzuri baphonguphiwa nje izikhundla abakuzo.
Konke lokhu kwenzakala sekusele inyanga ezimbalwa ukuthi kwenziwe ukhetho lokudinga umongameli kunye lenye inkokheli ebalisa amalunga edale lamakhansila.
Abanye abasekeli bebandla basola imuli kaTsvangirai besithi akumelanga ingenele kwezebandla ngoba lingayisilo lomdeni.
Ukuhlaziya loludaba, uSithandekile Mhlanga weStudio 7 uxoxe loMnu. Bernard Bhekilizwe Ndlovu, ingcwethi ecubungula ezombusazwe.
