amalinks wokungena

Breaking News

Imuli KaMugabe Ilamapulazi Phose Angamatshumi Amane


Inhlanganiso emela abalimi abamhlophe eZimbabwe, iCommerical Farmers’ Union (CFU) ithi uMongameli Robert Mugabe lemuli yakhe balamapulazi angamatshumi amathathu lathoba munwe munye-39, lanxa nje enguye ohlezi ekhuthaza ukubana umuntu ngamunye kumele abe lepulazi elilodwa.

Embikweni ewethule ngoLwesibili inhlanganiso le iveze njalo lokuthi ukuthunjwa mahlayana kwamapulazi abalimi abamhlophe ngabasekeli bebandla leZanu PF kubangele ukuba ilizwe lilahlekwele ngamaBillioni alitshumi lambili amadollar-$12 billion, eminyakeni elitshumi edluleyo.

ICFU ithi abalimi abamhlophe bebesenelisa ukulima batshaye inala ebisuthisa wonke umuntu indlala ingaziwa elizweni, kanti lesivuno sabo sithengiswa kwamanye amazwe ilizwe lithola inzuzo.

Kodwa ngokuthathwa kwamapulazi, isivuno lesi sehle kakhulu ngoba inengi labalimi abensundu abanikwe lawa mapulazi lingalalo ulwazi lokulima olujulileyo. Imizamo yokuxhuma isikhulumeli sikaMongameli Mugabe, uMnu George Charamba phezu kwenani lamapulazi kaMugabe lemuli yakhe yehlule.

Isikhulumeli sebandla leZapu uMnu Methuseli Moyo utshele uNtungamili Nkomo weStudio 7 ukuthi imbiko le iveza sobala ukuthi iziphathamandla zebandla leZanu PF yizo zodwa ezanikwa amapulazi, hatshi uzulu weZimbabwe.

​
XS
SM
MD
LG