Lanxa owayengukhomanda weZipra uMnu Abraham Nkiwane ephiwe inhlonipho yeqhawe lesizwe, imuli yakhe ithi izambeka epulazini lakhe eUmguza ngoMvulo, hatshi eHeros’ Acre.
Umsakazo weZBC uthi isiphathamandla seZanu PF uMnu Obert Mpofu uthe lanxa nje bebefisa ukuthi uNkiwane abekwe emathuneni amaqhawe eHarare njengoba ephiwe linhlonipho, uhulumende uyasihlonipha isinqumo somndeni wakhe.
UMnu Nkiwane ubhubhele esibhedlela koBulawayo ngoLwesibili eseleminyaka yokuzalwa engamatshumi ayisitshiyagalolunye lantathu, 93.
Wadlala indima enkulu ekulweleni ilizwe ekuZapu njalo ungomunye wabalweli bempi yenkululeko abathathu ababa ngabakuqala ukungenisa izikhali ngudlu elizweni.
Omunye owalwa impi yenkululeko laye obhubhe kuliviki uMnu Michael Chakabva laye usephiwe inhlonipho yeqhawe lesizwe. O
bengukhomanda webutho uMnu Edzai Chimonyo, yena oyetheswa icala lokuphatheka kumbhuqazwe weGukurahundi laye uphiwe inhloniphe efanayo.
Isikhulumeli sebandla leZanu uMnu Iphithule Maphosa uthi bakhala kanye lemuli kaNkiwane.
Amazwi kaMaphosa agcizelelwe ngumsekeli wesikhulumeli seMDC Alliance uMnu Felix Magalela Mafa Sibanda yena ithi kulihlazo ukuthi uChimonyo uphiwe lanye inhlonipho yeqhawe lesizwe yena waphatheka kumbhuqazwe weGukurahundi.
Kodwa ilunga leZanu PF uMnu Believe Gaule uthi kuqondile ukuthi uChimonyo abe liqhawe. Uthi njalo yinto embi ukuthi abantu sebevusa udaba lweGukurahundi phezu kwakhe.