Imvundiso ye fertilizer yohlobo lweAmmonium Nitrate ibikwa isisilela endaweni ezinengi eZimbabwe lapho esitholakala khona emikambo engekho emthethweni ngentengo ephezulu kakhulu.
Amankampani anjenge Chemplex Corporation Limited elamafekithali alungisa ifertilizer le athi ahlutshwa yikuswela imali yokulungisa imvundiso le lokuqonga kwendleko yomlilo kagetsi.
Amafekithali amabili ayiwo alungisa imvundiso le, iSable Chemicals le Zimbabwe Fertilizer Company, akhanya ezama ngamandla wonke ukulungisa imvundiso yeAmmonium Nitrate loba nje kusobala ukuthi ahlutshwa yimali.
Abaqondisi bamankampani la bayalile ukukhuluma le Studio 7 loba bekubeka sobala ebulenjini ukuthi adinga imali yokuvuselela ukulungisa imvundiso ye fertilizer.
Umnu. Moses Jiri umgcinisihlalo we khomithi yedale le phalamende ebona ngezokulima uthi ukusilela kweAmmonium Nitrate kuzakwehilisa kakhulu isivuno samabele salonyaka.
UJiri uthi kuyamangalisa ukuthi imvundiso le itholakala emikambo engekho emthethweni ngentengo engaba ngamatshumi amahlanu amadollar eMelika kulokuthi ithengiswe ngamatshumi amathathu amadollar.
Uthi kukhanya eyinye imvundiso le ithengwa ngabalimi eGrain Marketing Board ngetshumi lanhlanu lamadollar ibe isithengiselwa uzulu ngentengo ephezulu.
Omunye njalo okukhomithi le uMnu. Patrick Dube uthi kumele kujeziswe labo abatholakala bethengisa imvundiso le emikambo engekho emthethweni.
